MARINA: dul-an sa 100 ka

banka ang rehistrado na

TAGBILARAN CITY, November 9 (PIA)--Dul-an sa usa ka gatus ka motorized banca ang nahatagan sa opisyal nga papeles ug rehistrado na sa Marine Industry Authority (MARINA) sa labing bag-o niini nga gihimong mobile registration didto sa Panglao sa miaging mga semana. 

Gibutyag sa hepe sa MARINA Bohol nga si Norma Enriquez nga ang espesyal nga pagpangrehistro usa ka serbisyo nga gidala mismo sa ilang Central Office nganhi sa Bohol. 

Kini aron solbaron ang pagkuyanap sa ilegal nga pagpadumala sa mga byahe sa bangka nga de motor ilabi na sa Panglao, Baclayon ug sa mga isla dinhi sa Bohol. 

Gidason usab ni Enriquez nga ang pagrehistro sa mga bangk usa usab ka pamaagi aron kapanalipdan ang operator sa higayon nga may dautang mahitabo sama sa aksidente. 

Gawas nga may kontak na ang mga tinugyanan sa mga rehistradong bangka aron sayon ang pagluwas niini kon may suliran sa lawod, ang pagparehistro maghatag na usab sa mga pasahero sa insurance kon unsa man ang mahitabo. 

Gani, sa tulo ka adlaw nga gigahin alang sa pagpangrehistro lakip na ang physical inspection sa sea worthiness sa mga bangkang gamiton sa pagpamasahero sa mga turista ug sumasakay, gitanyag usab sa Central Office ang pro-poor nga balayranan. 

Sa pro-poor nga balyranan, inya molapas pa sa tag P6,000 ang kasagarang bayran sa usa ka operator, napakubos kini ngadto na sa P750 lamang, dugang ni Enriquez. 

May mga reglamento usab sa pagpangrehistro niadtong special mobile registration nga gisalikway na una aron maserbisyohan ang kadaghanan. 

Gisalikway unsa sa MARINA ang certificate of accreditation sa tighimo sa kasko sa bangka ug gipadaplin unsa ang estrikto nga rekisitos sa two way radio sa matag bangka, segun sa tinubdan sa MARINA. 

Human sa ika tulo ka adlaw, mikabat sa 99 ka bangka ang nahatagan sa ilang mga papeles samtang may pipila niini nga wala makahuman sa pagduso sa kompleto nga mga papeles hinungdan nga dili na makakuha sa pro-poor nga balayranan. 

Hinuon, gipalubad ni Enriquez nga mahimong paundayonan usab sa MARINA ang hangyo sa Baclayon alang sa laing espesyal nga pagpanglista. (rac/PIA-7/Bohol)

Hinay hinay apan kanunay, gibutyag niMARINA Chief sa Bohol Norma Enriquez nga mikabat na sa 99 ka bangka ang miparehistro sa ilang labing ulahing mobile registration didto sa Panglao. Gani, dugang niya, may gitanyagan pa sa P750 lang nga pro-poor fees nga kubos kon itandi sa kapin sa P6 mil nga kasagarang bayranan sa proseso. (PIA-Bohol)