Katawhan gi-aghat sa DENR

Pagpananum og ilang-ilang

SAN PASCUAL, UBAY November 8 (PIA)—Pananum og mas daghan pang ilang-ilang, aghat sa Department of Environment and Natural Resources (DENR).

Ang ilang-ilang usa ka tanum nga wala kaayo manginahanglan sa tubig og mahimong maoy itanum sa mga umaw nga kabungturan sa San Pascual, matud ni Sylvia Ordoñes sa Natural Resources Development Corporation sa DENR.

Kini usab samtang ang Ubay Federated Tree Planters Association Inc., (UFTPAI) mipahat nag pipila ka mga ektarya sa 240 ka ektarya nga natumbok alang sa National Greening Program (NGP), alang sa pagtanum og ilang-ilang.

Ang NGP usa ka proyekto sa DENR nga gipundohan sa kagamhanan agi og pagtubag sa panginahanglang pahinayon kon dili man ugaling masanta ang mga katalagmang dala sa nagkausab nga panahon.

Tumong sa NGP ang tamnan og mga kahoy ang mga umaw ug opaw na nga kabungturan sa Bohol ginamit ang mga local nga mga kahoy, lakip na ang ilang ilang.

Ang ilang-ilang usa ka kahoy nga kon mamuwak, mopabusilak sa iyang kahumot, matud ni Bernardita Albarando, presidente sa UFTPAI.

Gawas nga makatabang sa pagtabon sa mga umaw nga yuta aron mahiuli-an, ang ilang-ilang adunay humot nga alimyon nga mahimong sagol alang sa usa ka pahumot.

Ang ilang-ilang mahimong kuhaan sa ilang kahumot pinaagi sa prosesong distillation: ang makuha nga pahumot ibaligya alang usab sa dugang kita sa mga mag-uuma.

Mahal ang presyo sa pahumot ug matud pa sa National Local Development Corporation chief Sylvia Ordoñes, mahimo nga agig tabang sa mga katawhan sa Ubay, magdala sila og usa ka planta alang sa distillation sa ilang ilang didto.

Hinuon, tungod kay kinahanglan usab ang igo nga napupo nga buwak aron dili mag-undang undang ang pagproseso, daghang buwak ang kinahanglang magamit.

Gawas sa ilang-ilang, magpatanum usab ang DENR sa mga kahoy nga dili manginahanglan og tubig.

Gipaglantawan sa DENR ang pagpatanum usab sa rambutan, lanzones ug durian nga mas labaw nga nailhan nga motubo ng dili hakug sa tubig. (rac/PIA-7/Bohol)

Gisaysay ni Slyvia Ordoñez ang laraw nga mohatag ang kagamhanan sa usa ka distillation plant alang sa pagkupos sa duga sa ilang ilang aron mabaligya na ang iyang kahumot, samtang nagsud-ong sila DENR Secretary Gina Lopez ug Usec Isabelo Montejo. (rac/PIA-7/Bohol)