Paglista sa mga benepisyaryo sa Bohol

alang sa coco levy fund, gisugdan na sa PCA

TAGBILARAN CITY, November 11 (PIA)--Gisugdan na sa Philippine Coconut Authority (PCA) ang paglista sa mga pangalan sa mga nagtrabaho sa industriya sa lubi sa lalawigan sa Bohol nga makadawat sa ilang bahin sa P72.5-bilyon coco levy fund.

Mao kini ang gibutyag sa tigpamaba sa PCA nga si Jose Allan Cajilog atol sa gipahigayong Information Sharing sa mga miyembro sa Association of United Development Information Officers in Bohol (AUDIO-Bohol) kagahapon sa Reyna’s The Haven & Gardens ning syudad.

Matud pa ni Cajilog, 50 ka enumerators ang nanglista na karon sa mga lehitimong makadawat nga naglakip sa mga tig-iyahan ug yuta ug mga mag-uuma sa lubi alang sa alokasyon nga gitakdang ipanghatag sunod tuig.

Giingong ang maong proseso sa pagpang-lista magpadayon sa tibuok nasod taman Disyembre ning tuig mao nga gi-awhag ang mga mag-uuma sa lubi sa pagpa-rehistro sa mga buhatan sa PCA.

Apan gitataw sa PCA nga ang coco levy fund dili ipang apod-apod pinaagi sa kuwarta apan ipanggahin sa mga proyekto nga maka-benepisyo sa mga mag-uuma sa lubi ug sa ubang nalambigit sa industriya sa lubi.

Ang maong coconut levy fund kasamtangang nagpabilin karon sa national treasury samtang naghulat pa sa pagpagawas sa sumbanan sa paggamit sa maong kantidad. (ecb/PIA7-Bohol)