Comelec, nanawagan sa mga botanteng

na-deactivate sa pag-parehistro og balik

MANILA, November 11 (PIA)--Nanawagan ang Commission on Elections (COMELEC) sa mga botanteng na-deactivate ang registration sa ahensya nga pahimoslan ang lima ka buwan nga gitakdang voting registration nga nagsugod niadtong Nobyembre 7 hangtud sa Abril 29, 2017.

Matud pa sa tigpamaba sa COMELEC nga si James Jimenez, daku ang matabang sa maong mga botante nga na-deactivate mao nga angay maningkamot sa pagpa-re­histro og balik aron makabotar sa sunod nga eleksyon.

Ubos sa Republic Act 8189, o mas gi-ila sa ­Voters Registration Act of 1996, bisan kinsang mapakyas sa pagbotar sulod sa duha ka national elections, awtomatikong deactivated na ang rehistro ug dili na makabotar sa sunod nga eleksyon.

Kun wala naka-botar sa 2013 ug sa piniliay niadtong Mayo 2016, dili na maka-botar sa umaabot nga piniliay sa Oktobre 23, 2017 Barangay ug SK elections ug sa mga umaabot pang piniliay kondili magpa-reactivate, pasabot ni Jimenez.

Pahinumdom pa ni Jimenez sa mga magparehistro, magdala og valid IDs sama sa mga government-­issued IDs, corporate IDs, current school IDs, senior citizens ID, ug NBI Clearance nga kasagarang mahimong problema sa mga election officers. 

Gipaabot sa Comelec nga naa sa tulo ka milyong botante ang magparehistro alang sa barangay elections samtang duha ka milyon usab sa SK elections. (ecb/PIA7-Bohol)