Pagpatuman sa FOI, 

epektibo na karong adlawa 

TAGBILARAN CITY, November 25 (PIA)--Epektibo na karong adlawa ang pagpatuman sa Executive Order Number 2 ni Presidente Rodrigo Duterte o mas gi-ila isip Freedom of Information (FOI) sa mga sangay sa ehekutibo.

Dungan niini, gilusad usab sa Malakanyang ang electronic site sa FOI diin makita ang mga dokumento ug impormasyong kinahanglan o gustong mahibaw-an sa publiko.

Gawas niini, nagpagawas usab og listahan ang Malakanyang sa siyam (9) nga exemptions o mga impormasyon ug dokumento nga dili mahimong isapubliko.

Apil na dinhi ang mga confidential files nga may kalabotan sa mga government agencies, prejudicial premature disclosure, record of court proceedings ug ang mga impormasyong adunay kalabotan sa balaod sa banking and finance ug uban pang naglangkob sa gitakda sa balaod.

Ang FOI maghatag og dalan aron buksan ang impormasyon alang sa katawhan.

Sa FOI, mas mapadali ang pagkuha sa mga rekord, dokumento, research data, ug uban pang impormasyon gikan sa Executive Branch sa gobyerno.

Kun may gustong impormasyon nga pangayuon sa usa ka ahensiya sa gobyerno, kinahanglan lamang kumpletohon ang Request Form ug ihatag sa Receiving Officer sa ahensiya.

Hulaton lamang nga matapos i-proseso ang request sulod sa 15 ngadto sa 35 ka adlaw (working days), depende sa matang sa request.

Makadawat ang nag-request og text, tawag o email kun kanus-a ug unsaon pagkuha sa gi-request.

Alang sa kumpletong proseso ug detalye sa FOI, bisitaha lamang ang www.foi.gov.ph. (ecb/PIA7-Bohol)