Pahinumdom sa DOLE sa mga employer: 

ipatuman nga regular holiday ang Nob. 30

MANILA, November 25 (PIA)--Subling gipahinumdom ni Department of Labor and Employment (DOLE) Kalihim Silvestre Bello III sa mga employer nga sundon ang sumbanan sa pagbayad sa regular nga holiday sa nasod.

Ang maong panawagan gihimo ni Bello tungod sa nagsingabot nga paghandom sa ika-153 ka tuig nga adlaw’ng natawhan ni Gat Andres Bonifacio sa Nobyembre 30, nga natunong sa adlaw nga Miyerkoles.

Ang maong petsa deklaradong regular non-working holiday.

Base sa Labor Law, kun ang usa ka kawani dili mosulod sa Nobyembre 30, kinahanglan siyang sweldohan og 100 porsiyento kauban na ang COLA.

Apan kun ang usa ka kawani mosulod sa maong adlaw nga usa ka regular holiday, doble na ang iyang sweldo sa unang walo ka oras kauban na ang bayad sa COLA.

Ug kun mo-trabaho ang usa ka kawani sa kapin sa walo ka oras (overtime work), kinahanglan siyang bayaran og dugang 30 porsiyento sa iyang inoras nga sweldo sa maong adlaw.

Kun mo-trabaho sa maong adlaw nga natunong sa iyang adlaw sa pagpahulay, bayaran siya og dugang 30 porsiyento sa iyang inadlaw nga suholan nga 200 porsiyento.

Apan kun mo-trabaho sa kapin sa walo ka oras (overtime work) sa maong adlaw nga mao usab ang adlaw sa iyang pagpahulay, kinahanglan siyang bayaran og dugang 30 porsiyento sa iyang inoras nga suholan sa maong adlaw. (ecb/PIA7-Bohol)