Customs, nipasidaan batok sa sayop 

nga pagdeklarar sa balikbayan boxes

MANILA, December 14 (PIA)--Nipasidaan ang Bureau of Customs (BoC) batok sa sayop nga pagdeklarar sa kantidad nga gisulod sa mga balikbayan box.

Human kini sa gipagawas nga Customs Administrative Order (CAO) 05-2016 o ang implementing rules and regulations sa Section 800 (g) sa Customs and Modernization and Tariff Act (CMTA) diin nahisulod ang balikbayan boxes sa mga OFWs.

Ubos sa kamanduan, ang mga balikbayan box nga adunay sulod nga mga gamit nga nagkantidad og P150,000 paubos, exempted na sa pagbayad og buhis sugod karong Disyembre 25.

Kalabot niini, gipasabot ni CMTA IRR Project Manager Althea Acas nga aron ma-exempt sa buhis, angay nga ang sulod sa mga balikbayan boxes mga personal ug gamit sa panimalay lamang.

Hugot nga gidili ang bisan unsang matang sa commercial quantity sama sa laptop.

Gipasidan-an usab ni Acas ang mga lokal nga freight forwarders nga mag-atubang og suspensiyon ug e-black list kun mapamatud-ang nakig-kunsabo alang sa misdeclared content sa matag balikbayan box. (ecb/PIA7-Bohol)