Amyenda sa Sin Tax Law, 

aprubado na sa Kamara 

MANILA, December 14 (PIA)--Aprubado na sa ikatulo ug katapusang pagbasa ang balaodnong mag-amyenda sa Sin Tax Law.

Sa boto nga 176 – pabor, 30 – supak ug 3 – abstain, nipatigbabaw ang tingugha sa mga magbabalaod nga mapalig-on ang House Bill 4144 diin ipabilin ang two-tier system sa buhis sa sigarilyo.

Sa gi-aprobahang balaodnon, himuon nang P36 ang ipahamtang nga buhis sa mga high end o premium brands nga sigarilyo, samtang P32 na ang ibayad nga buhis sa mga kumpanya sa mga low end brands nga sigarilyo gikan sa kanhi P29 lamang.

Tungod sa dugang buhis, gipaabot nga mokita ang gobyerno og P13 taman P18 bilyon matag tuig.

Masaligon si Ways and Means Committee Chairman Dakila Carlo Cua nga magmalamposon ang katoyuan sa balaodnong mag-amyenda sa Sin Tax Law.

Matud pa ni Cua nga makatarungan ang katoyuan niini nga magbaton og balanse diin mabuhi ang panginabuhian sa mga mag-uuma sa tabako.

Apil na usab niini ang hinay-hinay nga pagpakunhod sa mga tigpanigarilyo samtang adunay dugang kita usab ang gobyerno.

Sa labing ulahing datos, mikabat na sa 4.5 milyong Pilipino ang nihunong sa pagpanigarilyo human mapalabang ang Sin Tax Law tungod sa taas nga buhis niini. (PIA-Bohol/ecb)