VAT-free nga panaliton, mapahimoslan 

na sa mga PWDs sa dili pa mag-Pasko 

TAGBILARAN CITY, December 14 (PIA)--May gi apas nga pinaskohan ang gobyerno alang sa mga persons with disabilities (PWDs) karong tuig.

Kini tungod kay magamit na nila ang ilang extended benefits sama sa exemption sa value-added-tax (VAT) sa mga panaliton ug serbisyo sugod karong Disyembre 23.

Human kini gilagdaan niadtong Disyembre 1 ang Implementing Rules and Regulations (IRR) sa R.A. 10754 nga gi-ila usab sa tawag nga “An Act Expanding the Benefits and Privileges of Persons with Disabilities.”

Ubos niini, mahatagan og VAT exemption ang mga PWDs sa pipila ka panaliton ug serbisyo gikan sa tanang mga establisyimento gawas pa sa ilang 20 porsiyentong diskwento.

Aron mahibaw-an usab kun unsa ang mga pribilehiyo ug benepisyo alang sa mga PWDs, nakalatid usab sa balaod ang pagbutang og mga signages kalabot niini sa mga establisyimento.

Nahisulod niining balaod ang mga restaurants, recreation centers ug lodging establishments, apil na sa pagpalit og mga tambal, medical ug dental services, domestic air, sea ug land transportation travel, lakip na usab ang funeral ug burial services.

Nakalatid usab dinhi ang paghatag og tax incentives alang sa mga kapamilya nga kauban ug nag-atiman sa mga PWDs nga taman sa fourth degree of relation.

Samtang gipasabot sa Department of Social Welfare and Development (DSWD) nga dili tugotan ang double discounts sama na lamang kun parehong adunay PWD ug senior citizen IDs ang usa ka indibidwal diin usa lamang sa duha ang mahimo niyang gamiton. (ecb/PIA7-Bohol)