Deadline sa pagpa-ilis sa daang salaping 

papel, gi-uswag taman Marso sa BSP

MANILA, December 29 (PIA)--Gi-uswag pa taman Marso 2017 sa Bangko Sentral ng Pilipinas (BSP) ang pagpa-ilis sa mga daang salaping papel.

Una nang gitakda sa BSP hangtud Disyembre 31, 2016, ang deadline sa pagpa-ilis sa mga daang banknotes o kadtong mga New Design Series (NDS).

Apan gitataw ni BSP Deputy Governor Nestor Espenilla nga base sa desisyon sa Monetary Board, ang pagpa-ilis sa NDS banknotes lamang ang gi-uswag ug sugod sa Enero 1, 2017, demonetized o wala nay bili ang mga daang salaping papel. 

Dugang pa ni Espenilla, ang pagpa-ilis sa daang salaping papel mahimong himuon sa mga awtorisadong bangko sa BSP.

Giingong ang mga mobalibad nga bangko sa pag-ilis sa mga daang salaping papel pahamtangan og silot sa BSP. 

Sa banabana sa BSP, naa sa 9 porsiyento o kapareho sa 295.7 milyon kabuok pa sa 3.34 bilyon kabuok nga salaping papel ang naa pa sa sirkulasyon karon. (ecb/PIA7-Bohol)