Dula nga Dagon sa Hoyohoy 

abuksan sa Cultural, Dec. 16

TAGBILARAN CITY, December 13 (PIA)—Human sa pipila ka tuig nga pagpahuway, mobukas na usab ang tabil alang sa dula nga kinanta o musical drama nga nagsaysay sa kinabuhi sa Bol-anong bayani nga si Dagohoy.

Ang dula nga gikanta buksan sa Bohol Cultural Center sa Biyernes Disyembre 16 sa duh aka hugna: matinee show sa alas 2:30 sa palis ug ang gala show sa alas 7:30 sa gabii.

Ang dula nga gisuwat ni Marianito Luspo ug gihimo-ag musika ni Elvis Somosot gipahiluna alang sa entablado nila ni multi-awarded director Lutgardo Labad ug Rodolfo Cuhit.

Ang dula nga gi-ulohan og Dagon sa Hoyohoy, nagsaysay sa kinabuhi ug panimpalad ni Francisco Sendrijas, us aka yanong tawo nga napugos sa pag-isa batok sa mga Espanyol nga prayle tungod sa pagdumili niini sa paglubong sa iyang igsoon.

Rason usab sa prayle, walay luna sa langit alang ang mga kalag sa mga tawo nga namatay sa dwelo.

Human sa tulo ka adlaw nga nagbangutan samtang nangindahay nga malukmay ang pari, nakahukom si Franciso nga moasdang sa kombento ug iyang gilunggo-an ang pari.

Human niadto, mikaylap ang pag-alsa ni Francisco, kinsa gikan sa iyang pagkabata, natugahan sa dagon sa hoyohoy nga maghimo kaniyang makalupad tadlas sa mga kabukiran aron makaipsot gikan sa mga sundalong nangita kaniya.

Ang Dagon sa Hoyohoy usa lamang sa pipila ka buhi nga drama nga nagpadayag sa abilidad sa mga Bol-anon sa pagmugnag arte alang sa entablado.

Ang dula sa alas 2:30 sa palis gipaabut nga punsisokan sa mga estudyante ug mga kabataan nga buot mosinati ang kasaysayan sa Bohol ug sa halos nahikalimtang kinabuhi ni Dagohoy.

Sa laing bahin, daghan ang nagtuo nga angayan na nga masayran sa kabataan ang kasaysayan isip ilang tumbanan lunsaran paingon sa mas mahinungdanong kaugmaon.

Segun pa sa panultihon, ang magdumili sa pagkat-on sa kasaysayan mahimong mag lit-ag pag balik sa mga panghitabo sa magbalik nga kagahapon.

Lain usab nga pagbukas sa entablado ang mahitabo sa alas 7:30 sa gabii. (rac/PIA-7/Bohol)

Ang Dagon sa Hoyohoy (nga maoy gamot sa pangalang Dagohoy) ipasundayag sa entablado sa Biyernes, December 16 sa duha ka hugna: 2:30 sa plais ug 7:30 sa gabii. (PIA)