NM mitugyan sa napahiuli

nga Inang-angan sa Loon

LOON, Bohol, December 14 (PIA)--Human sa 90 ka adlaw o tulo ka buwan nga pagtrabaho, gitugyan na sa National Museum (NM) ngadto sa katawhan sa Loon ang bag-o lang napahiuli nga hagdanang bato nga nailhan sa ngalan nga Inang-angan. 

Didto sa hamubo nga seremonyas, gilagdaan sa mga taga Loon nga girepresentahan ni Mayor Elvi Peter Relampagos ug sa NM pinaagi ni Director Angel Bautista ang kasabutan pagtugyan sa napahiuli na nga karaang hagdanan nga nagsumpay sa kanhi kabisera sa lungsod didto sa Napo ug sa bungtod sa Moto. 

Gitukod niadtong 1847 ngadto sa 1850, ang Inang-angan, una pang nahuman sa wala pa kasugdi ang Simbahan sa Kasilak, aron mas dali ang paghakot sa mga kagamitan sa pagtukod sa mga dagkong gambalay sa panahon sa mga Espanyol, saysay ni Athena Garcia-Vitor, sa NM Bohol.

Ang inang-angan may gilapdong 6 metros ug may lima ka hugna sa kinatibuk-ang 212 ka ang-ang nga hagdanang bato, nadaut sa linug niadtong Octubre 2013. 

Tungod kay una na nga nadeklara sa NM isip Nasudnong Kulturanhong Katigayunan (National Cultural Treasure) niadtong 2010, bisan pa kon kini kabtangan sa simbahan, gipundohan gihapon sa nasudnong kagamhanan, pasabut ni Director Angel Bautista.

Dugang ni Bautista nga ang Inang-angan maoy labing una nga proyekto nga gitugyan nag balik sa NM sa katawhan human mapatuman ang mga pagpahiuli niini. 

May mga 17 ka proyekto ang NM sa Bohol nga gipundohan sa nasudnong kagamhanan ug halos mahuman-human na usab ang ubang proyekto sama sa bantayan sa Punta Cruz, Panglao, Dauis, mga simbahan sa Santa Monica sa Aburquerque, Dimiao ug sa Baclayon. 

Kini nga mga nahinganlang proyekto gipundohag minilyon sa nasudnong kagamhanan, segun pa sa NM.

Sa kabahin sa Inang-angan, P2,160,138.89 ang pundo nga nagamit sa pagpahiuli niini. 

Sa iyang kabahin, bukas sa kasingkasing nga gidawat ni Mayor Relampagos ang nahiuli-an na nga kulturanhong katigayunan, samtang misaad usab nga abagahon na sa lungsod ang pagmintinar aron dili abusaran ang maong kara-ang hagdanang bato. (rac/PIA-7/Bohol)

Gipakita sa mga opisyales nga mitunol ug nagdawat sa napahiuli nga Inang-angan ang kasabutan sa pagtugyan ug pagbalhin sa responsibilidad sa pag-atiman sa karaang hagdanang bato, atul sa usa ka yano nga seremonyas sa Loon. (rac/PIA-7/Bohol)