Freezer, display tables gisaad

ni Mayor Jao sa CFLC Tubigon

TUBIGON Bohol, December 12 (PIA)--Duha ka stainless steel display tables ug usa ka freezer ang gidugang nga gasa ni Mayor William Jao ngadto sa mga mananagat ug sa mga silingang mga dapit nga nakadawat sa usa ka Community Fish Landing Center (CFLC) nga gitukod sa Guiwanon, Tubigon. 

Ang stainless steel nga mga lamesa gipaneguro nga ang mga displayhanan sa isda, limpyo ug sayun rang imintinar, gawas pa, dili dali madaut sa tubig dagat, pasabut ni Bureau of fisheries and Aquatc Resources Bohol Provincial Head Leo Bongalos. 

Gawas pa sa display tables, misaad usab si Jao sa usa ka freezer aron may magamit ang mga mangingisda nga magtumod sa ilang kuha sa CFLC kon dili kini dayon mahalin, aron dili dali nga madubok. 

Ang display counters ug freezer maoy bahin nga gisaad sa lungsod sa Tubigon nagdto sa iyang mga katawhan nga midawat sa CFLC gikan sa pundo sa BFAR ug sa National Anti-Poverty Commission (NAPC).

Ang pasilidad nga gitukod isip duha ka andana nga merkado may dapit usab alang sa mga tigum sa mga mananangat, sa pag-puna sa ilang mga gisi nga pukot, pag-ayo sa mgha guba nga panagat ug sa paghimog mga kalihukan nga mag dugang sa kita sa katawhan, matud ni Bongalos. 

Sa pagtunod sa pasilidad, mismo si Mayor Jao ang mibungat sa iyang pangindahay nga unta tungod sa bag-ong pasilidad nga dunggo-anan ug tumodanan sa isda, mobarato na ang presyo sa isda sa lungsod. 

Gitunol ni BFAR Bohol Fishery Officer Leo Bongalos ang ceremonial nga susi alang sa pagtunol sa responsibilidad sa pasilidad ngadto kang Mayor Jao ug sa mga sakop sa Sangguniang Bayan, ngadto na sa mga opisyales sa lungsod kinsa mao unay mopadagan sa pasilidad samtang bansayon pa ang mga kahugpungan sa mananagat didto. 

Ang CFLC sa Tubigon maoy ika duha sa walo ka susamang pasilidad nga gihatag sa BFAR/NAPC nagdto sa Bohol sa pahat niini sa 2016. 

Una nga nga gitunol sa BFAR ang pasilidad sa Inabanga samtang itunolay na usab inig ka human ang mga CFLC sa Pitogo, Bien Unido, Calape, Ubay, Anda ug ang sa Baclayon. (rac/PIA-7/Bohol)

Si Mayor Jao sa Tubigon miabi-abi kang Archie Lungay, representante ni Cong Rene Relampagos ug BFAR Fishery Officer Leo Bongalos atul sa pagtugyan sa P2.7M nga Community Fish Landing center sa Guiwanon. (rac/PIA-7/Bohol)