BSP, bukas sa ideya sa pagpatukod

sa ilang buhatan sa Panglao 

TAGBILARAN CITY, December 13 (PIA)--Ang Bangko Sentral ng Pilipinas (BSP) bukas sa ideya sa pagpatukod sa ilang Bohol branch sa lungsod sa Panglao kun walay makitang propedad sa syudad sa Tagbilaran nga makasunod sa estriktong nilang requirements.

Kini ang gibutyag ni Bank Officer Hazel Cultura ngadto sa mga miyembro sa Association of United Development Information Officers in Bohol (AUDIO-Bohol) atol sa ilang General Assembly Meeting nga gi-host sa BSP niadtong Disyembre 8, 2016 didto sa JJ’s Seafood Village, ning syudad.

Matud pa ni Cultura, ang BSP nagtinguha gayud sa pagpatukod sa ilang buhatan dinhi sunod tuig o kun may makita nang angayan nga lugar nga mahimong nia lang sulod sa syudad nga gi-ila, gitugtan ug aprobado. 

Gitumbok ni Cultura ang lungsod sa Panglao diin gitukod karon ang new Bohol airport o sa silingan’g lungsod niini nga lungsod sa Dauis ang ilang gi-konsiderar nga ‘ideal site’. 

Ang lot area alang sa maong pasilidad kinahanglang dili mo-ubos sa 5,000 square meters subay sa major road network o sa usa ka lugar nga wala na’y laing angay nga tarokan, ang frontage sa lote kinahanglang dili moubos sa 50 metros.

Gibutyag ni Cultura nga diha na unta’y potensiyal nga lugar nga nakita sa BSP sa syudad sa Tagbilaran apan ang Mines and Geosciences Bureau (MGB) ug Philippine Institute of Volcanology and Seismology (PHIVOLCS) nitambag kanila sa pagpangita og laing lugar tungod sa geological hazard sa maong dapit human sa pagtay-og sa 7.2 magnitude nga linog sa Bohol niadtong 2013.

Samtang wala pa sila’y nakitang ideal site, gi-awhag ni Cultura ang mga interesadong landowners sa pag-contact sa Kagamhanang Probinsiyal sa lalawigan sa Bohol aron magbaton og direktang akses sa mga otoridad sa BSP nga maoy nagdumala sa maoang proyekto.

Ang BSP sa Bohol magresulta sa mas maayong kalidad sa pagpatuyok sa salaping papel ug sinsilyo ug mas sayon nga akses alang sa mga Bol-anon sa pagpabaylo sa ilang mga gum-os ug dili na magamit nga nga salaping papel ug silsilyo ug sa pagtugyan sa mga pekeng salapi. (ecb/PIA7-Bohol)