Kapin sa milyon nga drugas 

nasakmit sa Nob-Disyembre

TAGBILARAN CITY, December 28 (PIA)--Sulod sa 47 ka adlaw nga subsob nga operasyon, nasakmit sa kapolisan sa Bohol ang kapin sa usa ka milyon nga bili sa ilegal nga drugas ug natanggong ang 58 ka tawo. 

Kini maoy unod sa taho nga gisaysay sa Kampo Dagohoy atubangan sa mga sakop sa Provincial Peace and Order Council (PPOC) sa miaging semana. 

Didto sa katapusang PPOC sa 2016, gibutyag sa Kampo Dagohoy, pinaagi ni Police Superintendent Lorenzo Batuan, Operations chief, nga bisan kon nagkanihit na gyud ang ilegal nga drugas, miabut pa gihapon sa dul-an sa 85 ka gramos nga shabu ang ilang nasakmit sa 38 ka managlahing operasyon. 

Sa buwan sa Nobyembre, sa 27 ka operasyon nga gihimo sa mga kapolisan batok sa drugas ug sa patigayun niini, 44 ka tawo ang ilang nadakpan ug mokabat sa 42.828 ka gramos nga gituohang shabu ang nasakmit. 

Segun sa Dangerous drugs Board, kini nagkantidad na sa P505,370.40 o kapin sa tunga sa milyon. 

Pagka Disyembre 1-17, sa 11 ka mga operasyon, 14 na ka tawo ang nadakpan ug nasakmit sa kagamhanan ang 42.51 ka gramos nga gituohang shabu nga may bili segun sa DDB nga naa sa P501,618.00.

Sa kinatibuk-ang panahong nahisgutan, 85 usab ka kaso ang naduso sa kapolisan ngadto sa piskaliya aron sugdan na ang paghusay og pagtumbok sa mga sad-an. 

Kini usab samtang human sa 50 ka adlaw nga gipatuman sa kapolisan ang Double Barrel Alpha, sugod sa Oktubre 26, mikabat na sa 3,687 ang ni surrender o nadakpan human giagni sa kapolisan. 

Kini, matud pa ni Col. Batuan, naa na sa 107% sa ilang target nga gitala alang sa Disyembre 2016. (rac/PIA-7/Bohol)