PPOC nalipay na sa 11 ka

"hukom sad-an" sa druga

TAGBILARAN CITY, December 28 (PIA)--Nakaginhawag dyutay ang mga sakop sa Provincial Peace and Order Council (PPOC) sa Bohol sa balita nga miabut na og 11 ka kaso batok sa ilegal nga drugas ang nahukmang may sala. 

Sa labing bag-ong PPOC meeting didto sa Governor's Mansion, napalutaw sa taho sa Philippine Drug Enforcement Agency (PDEA) nga sa mga nahukmang kaso sa ilegal nga drugas sa buwan sa Nobyembre 2016, duha ka kaso ang wala na gani maka-uno sa kortes ug gi-tambog na. 

Laing upat usab ka kaso ang nahukman apan gipawalay sala tungod sa kakuwang sa ebidensya aron patuohon ang Korte nga walay duda nila nga pagkahilambigit sa drugas. 

Napulo ug usa ka kaso usab ang nahukmang sad-an batok sa mga napasanginlang nagpatigayun sa gukdonong drugas. 

Ang taho nga gibasa ni Department of Interior and Local Government (DILG) Reina Quilas, nakapagaan sa buot ni Prosecutor Macario delusa kinsa mibutyag nga medyo may maayo na nga gipakita ang dagan sa mga husay. 

Kaniadto, masagmuyo permi ang mga sakop sa PPOC tungod kay bisan sa tataw nga mga kadaugan nga maangkon sa mga tinugyanan sa balaod batok sa ilegal nga patigayun sa drugas, halos libre gihapon ang mga kriminal kay menos ang pagdesidir sa mga kaso nga isang-at. 

Hinuon, sa kinatibuk-ang mga kaso nga gihukman sa mga korte sa Bohol, daku pa gihapon ang trabahoonon aron masolbad ang mubo nga hukom sa pagkasala. 

Gitaho sa PDEA nga miduso silag 193 ka kaso sa ilegla nga payuhot sa drugas sa mga Regional trial Courts, samtang may 143 ka kaso usab nga giduso ngadto sa City og Provincial Prosecutors Office. 

Gani, mikabat sa 28 ka kaso ang ang gitambog usab sa Prosekusyon tungod sa kakuwang sa basehanan nga husayon ang mga gidudahang sad-an. 

Sa susamang higayon, gitaho sa PDEA nga adunay 99 ka tawo nga nadakpan samtang may tulo nga nakaipsot, o wala maabti sa mga operasyon sa ahensya. (rac/PIA-7/Bohol)