Mga angay bantayang ‘security features’ 

sa mga bag-ong salaping papel

TAGBILARAN CITY, December 15 (PIA)--Daghang mga security features nga angay nga bantayan sa publiko sa mga New Generation Currency (NGC) series o mga bag-ong salaping papel.

Una na niini ang gitawag nga Embossed Prints o mas tataw ang mga letra nga mabasa ilabi na ang marka nga ‘Republika ng Pilipinas’ ug ang letra sa kantidad sa salapi.

Mahikap usab ang larawan sa tawo nga napatik sa salapi, mga lagda sa Presidente sa Pilipinas ug Gobernador sa BSP ug ilabi na ang mga numerikong nakasulat sa upat nga suok sa salaping papel.

Pasaka usab ang pagka-imprenta sa mga numero sa Serial Number sa matag salaping papel.

Makita ang mga Serial Number sa tuo nga bahin sa ibabaw ug wala nga bahin sa ubos nga parte sa salaping papel. Ang Serial Number gilangkoban sa duha ka managlahing letra ug lima ka numero.

May gibutang usab nga Security Fibers sa NGC series nga dili dayon mabantayan sa simpleng pagta-aw lamang niini gawas na lamang kun ipatungod kini sa ultra violet lights. 

Kolor pula ug asul nga magbaylo-baylo og posisyon ang kolor niini kun ipatungod sa ultra violet lights.

Mao kini ang murag mga lugas nga gikatag sa puting parte sa salaping papel.

Sa tuo nga bahin sa ibabaw sa ulo sa tawo nga naka-imprenta sa salaping papel, makita ang Watermark o anino sa imahe sa tawo nga naka-imprenta niini.

Kun tan-awon ang salaping papel sa mas hayag nga lugar o di kaha ipatungod sa sidlak sa adlaw, mogawas ang kantidad sa salapi nga nakasulat nga nagtakilid paubos.

Samtang gitataw sa BSP nga parehong dawaton sa sirkulasyon ang NGC nga salaping papel nga P100 nga medyo lasaw ang pagka-kolor ube ug ang bag-ong P100 nga maube ang kolor.

Gipagawas niadtong Pebrero 2016 ang mas maubeng P100 isip tubag sa giingong kanunay masaypang P1,000 nga unang gipagawas nga NGC banknote. (ecb/PIA7-Bohol)