Pagpabaylo sa mga daang salaping papel,

taman na lamang katapusan sa Disyembre 

TAGBILARAN CITY, December 15 (PIA)--Bukas ang tanang mga bangko sa Pilipinas, pribado man o gipanag-iya sa gobyerno aron modawat sa mga magpabaylo sa ilang daang salaping papel hangtud Disyembre 2016.

Kini ang subling gipahinumdom sa Bangko Sentral ng Pilipinas (BSP) sa mga information officers sa mga kalungsoran ug nasudnong ahensiya sa gobyerno sa lalawigan sa Bohol ning bag-o lang didto sa JJ’s Seafood Village, ning syudad.

Sa bag-o lang gipahigayon nga general assembly meeting sa mga miyembro sa Association of United Development Information Officers in Bohol (AUDIO-Bohol) nga gi-host sa BSP, gipahinumdom ni Bank Officer Hazel Cultura nga ang mga daang salaping papel ubos sa New Design Series (NDS) dili na madawat sugod Enero 1, 2017.

Bisan niadto pang Enero 1, 2016 gipahunong sa BSP ang paggamit sa mga daang salaping papel isip pangbayad ug pang-sukli, mahimo pa kining ipabaylo sa mga bangko alang sa mga New Generation Currency (NGC) banknotes taman karong kataposan sa Disyembre.

Ang gitumbok nga mga daang salaping papel mao kadtong mga gi-imprenta sa BSP niadtong tuig 1985.

Tuig 2010 sa dihang gipagawas sa BSP sa sirkulasyon ang NGC nga paghidangat sa Enero 1, 2017, kini na lamang ang mahimong gamiton sa mga transaksiyon sa bangko ilabi na sa pagbayad ug pagpanukli. 

Matud pa ni Cultura nga mahimong magpabaylo sa bisan asang bangko bisan walay ‘existing account’ tungod kay obligado man ang tanang mga bangko nga alisdan og NGC banknotes ang bisan kinsang adunay gigonitan nga daang salaping papel nga gustong magpabaylo.

Gipasabot ni Cultura nga kun dugay na kaayo ang salaping papel, matun-an na ug masundog ang detalye niini mao nga kinahanglan na kining alisdan. (PIA-Bohol/ecb)

Si BSP-Cebu Bank Officer Hazel Cultura nag-kumparar sa kolor sa bao-o ug daang P100 peso bill. Ang BSP nipagawas niadtong Pebrero 2016 sa mas maubeng kolor sa P100 bill isip tubag sa giingong kanunay masaypang  P1,000 nga unang gipagawas nga NGC banknote. (ecb/PIA7-Bohol)