Mga salaping papel nga pirmado ni 

Duterte, ipagawas sunod semana 

MANILA, December 15 (PIA)--Ipagawas na sa sunod semana sa Bangko Sentral ng Pilipinas (BSP) ang mga bag-ong salaping papel nga nilagdaan na ni Presidente Rodrigo Duterte. 

Matud pa ni BSP Governor Amando M. Tetangco, andam na ang unang batch niini ug gipaabot nga mapagawas na kini sunod semana human makumpleto ang proseso sa releasing sa mga bangko. 

Sukad karon, mag-imprenta lamang ang BSP og mga salaping papel nga adunay lagda ni Presidente Duterte ug giingong gitan-aw na usab nila nga makapagawas og mga bag-ong sinsilyo. 

Kalabot niini, gipahinomdoman usab sa BSP ang publiko kalabot sa demonitization sa mga daang salaping papel ubos sa New Design Series (NDS) sa dili pa ang deadline niini sa Disyembre 31. 

Sugod sa Enero 1, 2017, dili na dawaton ang mga daang salaping papel ubos sa NDS nga gi-imprenta niadtong tuig 1985 ug kadto lamang mga salaping papel ubos sa New Generation Currency (NGC) o mga gi-imprenta niadtong tuig 2010 na lamang ang dawaton sugod sunod tuig. (PIA-Bohol/ecb)