Mga bag-ong opisyal sa AUDIO-Bohol, 

nanumpa sa katungdanan

TAGBILARAN CITY, December 9 (PIA)--Nanumpa sa pangatungdanan ang mga bag-ong napili nga opisyal sa Association of United Development Information Officers in Bohol (AUDIO-Bohol) kagahapon nga gipahigayon didto sa JJ’s Seafood Village ning suydad.

Ang AUDIO-Bohol usa ka hiniusang bahan sa mga information officers sa kalungsoran kun local government units (LGUs) ug mga ahensya sa kagamhanan kun national government agencies (NGAs) nga nagtambayayong sa pagpakatap sa mga kasayoran ngadto sa katawhan sa mga kalungsoran.

Napili sa pagka-presidente si Nicolas Sendrijas sa lungsod sa Calape.

Apil usab nga nanumpa sila: Ma. Lydia Bantugan sa Department of Agrarian Reform (DAR) isip Vice President for NGA; Fiel Angeli Espejo Araoarao-Gabin sa sudad sa Tagbilaran isip Vice President for LGU; Bernarda Villarojo sa Bohol Island State University (BISU) isip Secretary; Elvie Bongosia sa Philippine Information Agency (PIA) isip Assistant Secretary.

Samtang napili si Hermlina Bulasa sa Bureau of Treasury (BOT) isip Treaurer; Jojeline Ruiz sa lungsod sa Trinidad isip Assistant Treasurer; Ma. Elena Maniwang sa lungsod sa Balilihan isip Auditor; Bruce Eric Gideon Zabala sa Bohol District Jail (BDJ) isip Press Relations Officer sa 1st District; Ellen Marie Buno sa lungsod sa Talibon isip PRO sa 2nd District; ug Amiela Balaba sa lungsod sa Jagna isip PRO sa 3rd District.

Ang mga bag-ong opisyal nanumpa sa atubangan ni Clarin Mayor Allen Rey Piezas, ang Presidente sa League of Municipalities of the Philippines (LMP) Bohol Chapter.

Ang bahan natukod ubos sa pagsalig nga ang pagpakatay sa kasayuran maoy usa sa mga gimbuhaton sa mga kagamhanan aron ma-aghat niini ang katawhan sa paglihok alang sa ilang katagbawan. (PIA-Bohol/ecb)

==================

EO nga magmugna og komite aron tun-an 

ang 1987 Konstitusyon, gipagawas ni Duterte 

MANILA, December 9 (PIA)--Nagpagawas si Presidente Rodrigo Duterte og executive order nga magmugna sa 25-man consultative committee nga mag-review sa 1987 Konstitusyon.

Matud pa ni Executive Secretary Salvador Medialdea, gipagawas sa Presidente ang EO niadtong Martes ug gipagawas sa publiko kagahapong adlawa.

Gihisgotan ni Medialdea ang EO kalabot sa review sa Batakang Balaod sa unang adlaw sa pagdungog sa Senate Committee on Constitutional Amendments and Revision of Codes kauban sa Committee on Electoral Reforms and People’s Participation on Various Proposals to Amend or Revise the Constitution.

Gipasabot sa opisyal sa Palasyo nga baynte-singko ka indibidwal ang magmugna sa consultative committee aron tun-an ang 1987 Konstitusyon.

Gitumbok ni Medialdea ang posisyon sa Presidente nga kinahanglang amyendahan o bag-ohon ang konstitusyon partikular ang plano niining magbaton og federal form of government gikan sa kasamtangang presidential.

Gibalik usab sa opisyal ang gusto sa Presidente nga himuon ang balaodnong charter change pinaagi sa constituent assembly tungod kay mas tipid kini ug mas credible ang resulta.

Pinaagi usab sa botohan, giingong nagtuo ang Presidente nga angay bulag nga magbotohan ang Senado ug Kamara. (ecb/PIA7-Bohol) 

================

Consumer confidence, 

nakatala og record high

TAGBILARAN CITY, December 9 (PIA)--Nakatala og bag-ong record high ang consumer confidence sa atong nasod.

Kini ang nahisulod sa report sa Bangko Sentral Ng Pilipinas (BSP) base sa gipahigayong consumer expectation survey.

Base sa BSP data, nisaka sa 9.2 porsiyento ang nahimong pagsaka sa pagsalig sa konsumante tungod sa pipila ka mga nag-unang rason.

Apil na niini ang kalinaw ug kahusay, hapsay nga polisiya sa gobyerno, gipaabot nga pagsaka sa suholan ug pagbaton og daghang trabaho.

Gi-ila usab sa katawhan ang pagtabang sa gobyerno sa mga kabos pinaagi sa 4Ps.

Positibo usab ang panglantaw nila sa pagbaton og bag-ong Presidente sa nasod, hugot nga kampanya batok sa ilegal nga droga ug korapsyon. (ecb/PIA7-Bohol)