PEO gimandu-an pagsubay sa 

disgrasyadong eskina sa Dauis 

CORTES, Bohol, December 27, (PIA)—Gimandu na ni Gob Edgar Chatto ngadto sa Buhatan sa Provincial Engineer (PEO) ang pagsusi ug paghimo sa mga lakang aron pugngan na ang mga disgrasya nga nagpanghitabo sa eskina sa Tinago-San Isidro, Dauis.

Niadtong Disyembre 26 lamang, o upat ka adlaw human gireklamo ang disgrasyadong dalan, duha ka aksidente sa kadalanan ang nahitabo didto sa nahisgutang eskina. 

Una na nga gireklamo sa mga motorista ug manakayay ang kakuwang sa mga traffic signs nga ibutang unta sa mga nasudnon ug provincial roads. 

Didto sa Provincial Peace and Order Council (PPOC) Meeting Disyembre 22, giduso na usab ni Mayette Gasatan, sakop sa Bohol Chamber of Commerce and Industry, ug manager sa South Palm Resort ang kakuyaw sa nahisgutang mga dalan. 

Daghan na ang nadisgrasya tungod sa dili makita ang kasugat ug walay igo nga mga pahimatngon sa dalan alang sa mga motoristang nagsubay sa Tinago-San Isidro Road, obserbasyon ni Gasatan, kansang kapikas nagtrabaho usab sa PEO. 

Ang dalan usab nga gikan sa Mayacabac-Biking nga kasagaran tul-id, mohinay og liko subay sa San Isidro, diin dili makit-an ang kasugat. 

Walay piho usab nga mga sinyales ug pahimangno bisan pa sa nasudnong dalan sa Biking-San-Isidro ug Dao nga maka-pahibaw sa mga motorista sa apike nga dalan. Matud ni Gasatan. 

Gibutyag ni Gob Edgar Chatto nga kon ang dalan, sama sa Panglao Circumferential Road, sakop sa nasudnong kagamhanan, obligado ang Department of Public Works and Highways sa pagbutang sa mga karatola ug traffic signs. 

Apan, ang dalan nga nagtadlas niini, ang Tinago-San Isidro lagbas sa Flushing Meadows sakop sa lalawigan sa Bohol ang kasagarang hinungdan sa disgrasya. 

Tungod niini, giaghat ni Gob Chatto ang PEO sa paghimog inspeksyon niini aron sa labing dali nga panahon, kabutangan na sa tukmang road signs. 

Nataho usab sa PPOC nga daghang kaso sa krimen ang nalista apan ang hinungdan, mao ang aksident nga may kalambigitabn sa trapiko. (rac/PIA-7/Bohol)

Maayong pagka-otso sa ligid sa motorsiklo nga misungag sa Toyota Vios nga awto didto mismo sa eskina Tinago-San Isidro. Kining aksidente ikaduha na sa susamang adlaw, Disyembre 26. Kini usab ang gipatutokan sa gobernador ngadto sa PEO, nga maoy magpahimutang sa mga pahimangno trapiko sa dili pa makatabok sa eskina. (rac/PIA-7/Bohol)