NBI, nipasidaan batok sa 

mga skimmers sa Bohol

TAGBILARAN CITY, December 27 (PIA)--Ang National Bureau of Investigation (NBI) nipasidaan sa mga card holders sa Automated Teller Machine (ATM) nga magbinantayon gayud sa pag-withdraw og salapi taliwala sa mga natahong ATM skimming sa Bohol.

Ang maong pasidaan gipagawas sa mga opisyal sa NBI atol sa bag-o lang gipahigayon nga Provincial Peace and Order Council (PPOC) meeting diin matud pa nga may mga sindikatong nagpaluyo niini nga nang-biktima sa mga ATM ug credit card holders sa giingong skimming sa card information.

Si NBI Bohol executive officer, Atty. Arcelito Albao nitaho sa PPOC nga ang maong modus naglambigit sa mga tellers o point of sale swipe stations diin ang mga datos gikan sa card ibalhin pinaagi sa remote server nga maoy mag-kopya sa detalye sa account.

Ang mga skimmer mogamit og kasangkapan nga ibutang sulod sa ATM slot diin mo-activate kini kun pinduton na ang personal identification numbers (PIN) sa card holder.

Ang maong skimming device mokopya ug mopadala sa datos ngadto sa computer nga nahimutang lamang sa duol nga dapit.

Matud pa ni Albao, mas luwas ang transaksiyon nga himuon sa mga ATMs nga adunay monitor sa closed-circuit television cameras (CCTV).

Gi-rekomendar usab ni Albao nga adto lamang mag-withdraw sa mga ATMs nga nahimutang sa mga lamdag nga lugar sama sa mga malls, bangko ug uban pang commercial establishments. (ecb/PIA7-Bohol)