Presidente Duterte, naapil sa listahan sa 

World’s Most Powerful People sa Forbes Magazine 

MANILA, December 16 (PIA)--Mag-unom ka buwan human mapili isip pangulo sa nasod, naapil na si Presidente Rodrigo Duterte sa listahan sa mga pinakagamhanang tawo sa kalibotan sa Forbes Magazine.

Si Duterte nahimutang sa ika-70 nga puwesto sa World’s Most Powerful People.

Sa maong listahan, napatik ang 74 ka personalidad gikan sa nagkalain-laing dapit sa kalibotan nga makunsiderar nga gamhanan.

Sa pagkalakip kang Presidente Duterte sa listahan, gitumbok siya sa Forbes isip kanhi mayor sa syudad sa Davao nga napiling pangulo sa Pilipinas niadtong Mayo 2016 ug gihingosgan ang kampanya batok sa mga drug users ug uban pang kriminal.

Nakabutang usab didto nga ang war on crime ni Duterte niresulta na sa pagkamatay sa libuan ka tawo ug gihisgotan usab ang mga kontrobersyal nga pahayag sa president sama sa pagbuwag niya sa alyansa sa Estados Unidos.

Nag-una sa listahan sa ika-upat na nga higayon si Russian President Vladimir Putin ug nahimutang sa ikaduhang puwesto si US President-elect Donald Trump.

Nahimutang usab sa ikatulong puwesto si German Chancellor Angela Merkel ug ikaupat si Chinese President Xi Jin Ping.

Samtang natagak sa ika-48 nga puwesto si outgoing US President Barack Obama nga Second Most Powerful Person In the World niadtong tuig 2015. (ecb/PIA7-Bohol)