“Very good” net public satisfaction rating, 

napabilin ni Presidente Duterte

MANILA, December 16 (PIA)--Napabilin ni Presidente Rodrigo Duterte ang “very good” nga net public satisfaction rating niining ika-upat nga kwarter ning tuig 2016.

Sa kinaulahiang Social Weather Stations survey, nakakuha ang presidente og satisfaction rating nga +63 nga adunay pag-ubos og usa ka puntos lamang kun itandi sa iyang rating niadtong Setyembre nga +64.

Sa maong survey, migawas nga 77% sa 1,500 ka adults nga na-survey sa tibuok nasod ang nag-ingon nga satisfied o kuntento sila sa performance ni Duterte, 13% lang ang nag-ingon nga dili sila kuntento ug 10% usab ang undecided.

Ang mga gi-survey sa Mindanao ang naghatag og pinakataas nga rating sa presidente nga “excellent”.

Gipahigayon ang maong survey gikan Disyembre 3 hangtud 6.

Gikalipay kini sa Malakanyang diin miingon si Presidential Communications Office (PCO) Kalihim Martin Andanar nga nagpakita lamang kini sa sentemyento sa katawhan kalabot sa trabaho sa presidente.

Dugang pa ni Andanar, magsilbing inspirasyon sa administrasyong Duterte ang pinakabag-ong resulta sa SWS survey.

Pagsiguro pa sa kalihim, mas hingpit pa nga tumanon sa administrasyon ang mga gisaad ni Presidente Duterte nga pagsumpo sa ilegal nga droga, kriminalidad ug korupsiyon. (ecb/PIA7-Bohol)