Publiko, gi-awhag ni Presidente Duterte 

nga isumbong ang nahibaw-ang korapsiyon 

MANILA, December 13 (PIA)--Gi-awhag ni Presidente Rodrigo Duterte ang mga Pilipino nga isumbong dayon ang bisan unsang matang sa korapsiyon sa mga ahensiya sa gobyerno nga ilang nahibaw-an pinaagi sa pagbilin og ‘anonymous tips’ sa mga hotlines sa gobyerno.

Matud pa ni Presidente Duterte, kinahanglang motabang ang publiko ug kinahanglang isumbong nila ang mga ilegal nga aktibidad pinaagi sa pagtawag sa 8888 hotline nga bukas 24/7, o di kaha iduol sa state network nga PTV4.

Kahinumdoman nga gilusad sa Malakanyang ang 8888 hotline niadtong Agusto aron adunay masumbongan ang publiko batok sa mga hiwing opisyal ug dili maayong serbisyo sa mga ahensiya sa gobyerno.

Matud pa sa Presidente, kinahanglan lamang nilang ihatag ang ilang statement o pahayag ug di na nila kinahanglang isulti pa ang ilang pangalan.

Giingong gusto lamang sa Presidente nga ipahibalo kaniya sa katawhan kun adunay bisan unsang dili maayong panghitabo sa iyang mga ahensya ug buhatan.

Gitambagan pa ni Presidente Duterte ang mga motawag nga mogamit og bag-ong sim cards aron dili ma-trace ang tawag nila.

Giangkon usab sa Presidente nga lisud solusyunan ang korapsiyon ug bisan ang ubang nasod, nag-atubang usab niining problemaha taliwala sa ilang paglambo. (ecb/PIA7-Bohol)