Multa sa abusadong tricycles gikubra gihapon sa syudad

TAGBILARAN CITY, January 11 (PIA)--Wala magkawang ang pagsumbong sa mga abusadong tricycle driver, dayag nga pahayag ni Tagbilaran City Mayor John Geesnel Yap. 

Sa iyang pagduaw sa kapihan sa PIA sa miaging semana, gisaysay ni Mayor Yap ang gidangatan sa mga operator sa tricycle kansang mga drivers abusado. 

Sa mga nagtuo nga nakalusot na sila tungod kay ma mopatim-aw sa panahong ipatawag kay may reklamo batok kanila, gitigum sa City Traffic Management Office ang mga reklamo alang sa higayon nga sama niini, saysay sa Mayor sa syudad nga nag-atubang usab sa suliran sa traffic. 

Didto sa Kapihan, gipangutana ang batan-ong mayor kon unsay solusyon sa syudad kabahin sa tunog nga mga reklamo sa mga driver nga di magpasakay, mamilig pasahero, mangolekta og sobra ug walay batasan. 

"Hangyoon ta ang tanan nga mopadangat sa ilang reklamo ngadto sa TCMO, hangyo ni Yap. 

Daghan mana ng mireklamo, kasagaran wala nay panahon nga kita-on ug atubangon pa ang mga drivers tungod sa kalangan, segun sa CTMO. 

Apan, bisan kon wala kini mapadayon, gitigum gihapon sa mga tinugyanan sa syudad sa pagtuo nga mobalik gihapon ang mga tricycle drivers o operators sa panahon sa pagrenew sa mga permits. 

Ang tricycle sa Tagbilaran, ang syudad lamang ang naghatag sa prangkisa hinungdan nga adto gayud sa ilaha mosango kon may reklamo. 

Dugang ni Mayor Yap, may tricycle operator nga may balayronon sa multa nga miabut sa P6,000 tungod sa mga napundo nga mga reklamo.

Hinuon, gipasabut ni Mayor nga ang suliran sa traffic, dili lamang nasinati sa Tagbilaran apan lukop sa mga dagkong syudad. 

Ug bisan pa sa moderno nga traffic lights, gibutyag sa mayor nga daghan pang driver nga angay mo-adopt sa sitwasyon tungod kay daghan pang wala maanad. 

Nanghinaut hinuon si Mayor nga ang pagpahimutang sa multa, pagpanakop ug ang pagpadayon sa edukasyon makapahatag og solusyon sa suliran sa Tagbilaran karon. (rac/PIA-7/Bohol)

Wa magkawang ang mga reklamo, matud ni Mayor John Geesnell Yap tungod kay ang syudad mikolekta gihapon sa multa sa mga abusadong driver  sa tricycles bisan pa kon wala na kini mopatim-aw sa pag-atubang sa mga reklamante. Sa pagpang renew sa mga prangkisa, na-utingkay ang mga nagtipun-og nga multa. (PIABohol)