TAGBILARAN CITY, January 11 (PIA)--Sa usa ka libo nga umento sa pensyon sa mga sakop sa Social Security System, dyutay nga umento sa kontribusyon ang kaatbang.
Timaan sa maayong palisiya sa pagpadagan sa pundo alang sa kasegurohan sa mga empleyado sa nasud, kuygan sa 1.5% nga umento sa contribusyon sa Social Security System (SSS) ang usa ka libo nga pagtaas sa benepisyo nga pensyon.
Gikan sa 11% sa binuwan nga suholan nga itampo alang sa usa ka trabahante aron makadawat sa benepisyo, mahimo na kining 12.5% sugod sa Mayo 2017.
Kahinumduman nga, subay sa iyang saad sa padulong pa sa piliay, giaprobahan ni Presidente Rodrigo Duterte ang P1,000 nga usbaw sa benepisyong pensyon sa mga retiradong sakop sa SSS.
Sa usa ka press briefing sa Malakanyang, si Presidential Spokesperson Ernesto Abella, uban sa mga kadagkoan sa SSS, namahayag nga tas-an na usab ang binuwan nga salary credit nga kanhi gikan sa P16,000, ug karon naa na sa P20,000.
Uban sa mga SSS top officials: sila Chairman Amado Valdez ug President ug CEO Emmanuel Dooc, gipahayag ni Dooc ang mga kabag-ohan.
Hinuon, dugnag ni Dooc, mahimong malangan og dyutay ang pagpatuman sa umento sa pension, nga mahimong sa Pebrero na magsugod aron matibawas na ang pagkwenta sa mga bag-ong kontribusyon.
Lakip sa social contract sa Presidente ngadto sa nasud nga mao ang mga edaran na ug mga kabus nga nagtanyag sa ilang labing maayong panahon sa ilang kinabuhi sa pagpangalagad.
Una na nga gisugyot nga dili nalang una umentohan ang kontribusyon sa mga miembro, hinuon, gamiton ang buhis sa katawhan sa pagpundo sa pundong pang pensyon.
Apan tungod kay matud ni Presidente Duterte, ang SSS usa ka pribadong pundo alangs a pensyon, dili mahimo nga gamiton ang buhis sa kadaghanan, hinungdan nga gisagop ang pagumento usab sa contribusyon nga kakuhaan sa umento sa pensyon.
Tungod niini, ang umento sa kontribusyon magdagan sa tag P15 alang sa nagsweldo og usa ka libo ug P740 alang nadtong nagsweldo oh P20,000 pataas.
Dungan niini, ipahimutang sa SSS ang mga legal nga lakang aron kunhoran na ang mga pagkapalta sa balayronon, matud ni Dooc. (PND)
No comments:
Post a Comment