Tagbilaran mipahat og 

P7.5 M para's kapulisan

TAGBILARAN CITY, January 23 (PIA)--Alang sa kapolisan sa Tagbilaran City, gipahat sa kagamhanan sa syudad ang kapin sa P7.5 milyones nga hinabang nga tataw gayud nga nagpakita sa pagkiling sa syudad ngadto sa kahusay ug kalinaw ug ang pagkab-ot niini. 

Didto sa City Peace And Order Council meeting sa miaging semana, gibutyag ni Mayor John Geesnel Yap nga P5 milyones ang pundo sa syudad nga ila na nga gisaad alang sa pagpaugmad sa kapasidad sa kapolisan. 

Mahimong magkuha sa nahisgutang pundo ang kapolisan sa syudad alang sa pagbayad sa mga rehistro sa mga bansaybansay nga gikinahanglan sa kapolisan aron mas mamaayo sa ilang gimbuhaton. 

Gawas pa, gipundohan usab sa kagamhanan ang pagpamalit sa dugang armas ug mga bala aron hatagan kasegurohan ang kapolisan nga dili ma-iwit sa mahimong armas nga gigamit sa mga kriminal. 

Sa napakita nga Peqace and Order and Public safety Plan sa syudad, pundohan usab niini ang operational patrols, beat patrols, mga kampanya sa syudad kabahin sa kriminalidad, human trafficking, terrorism ug sa pagpadagan na unya sa bag-ong duha ka unit sa Special Weapons and Tactics (SWAT) niini. 

Lain nga P1 milyon ang gipahat usab sa syudad alang sa pagpalit og dugang mobile patrol alang sa kapolisan aron ugmaron pa ang police visibility niini, segun sa gibasa ni City Local Government Operations Officer Mardonio Roxas didto sa nahisgutang tigum. 

Gawas pa sa nahisgutang mga pundo, laing P1.5 milyones ang gipahat sa syudad alang sa pagtukod sa mga Police Community Precincts ug ang paghimo sa bag-o nga indoor firing range aron bansayan sa kapolisan sa ilang firing proficiency. 

Sa P7.5 milyones nag direktang ihatag sa kapolisan alang sa 2017, may usa ka bag-o na usab nga buhatan sa kapolisan ang Tagbilaran. 

Matud ni PSupt Nicomedes Olayvar, mahimong mobalhin na unya sa ilang bag-ong building ang City Police, bisan pa nga may panginahanglan na usab sa mas daku nga lugar alang sa city impound sa mga sakyanang madakpan. 

Gani, dugang ni CITY LGOO Roxas, nga may mas daku nga gipahat ang syudad alang sa kinatibuk-ang laraw alag sa peace and security, nga sahi ra sa napahat sa kapolisan. 

ANg Tagbilaran karon naningkamot nga mahimong mas malinayon ug kubos sa krimen sa pangandoy nga aghaton ang dugang mas daghan pang mamumuhunan nga magsugod og negosyo dinhi. (rac/PIA-7/Bohol)

May pagkiling ang syduad ngadto sa kahusay ug kalinaw, kini maoy tataw nga napakita niini sa City Peace and Order and Public Safety Plan nga nagsukip sa P7.5 milyones nga abag ngadto sa kapolisan, butang ni gihimo sa Administrasyon ni Mayor John Geesnell Yap. (rac/PIA-7/Bohol)