Sa mga menor nga gipamaneho, 

ang tag-iya sa sakyanan kasohan

TAGBILARAN CITY, January 23 (PIA)—Samtang dili makasuhan ang mga menor de edad kon magmaheho nga walay lisensya, ang tag-iya sa sakyanan ang gukdon. 

Kini maoy tambag ni Prosecutor Macario Delusa ngadto sa mga opisyal nga natahasan sa pagbantay sa trapiko pinaagi sa deputation o direktang pagsangon sa responsibilidad pinaagi sa Land Trasportation Office LTO). 

Didto sa labing bag-ong Provincial Peace and Order Council (PPOC) Meeting didto himoa sa Governor’s Mansion, mismo si Prosecutor Delusa mipahinumdom sa mga traffic enforcers ug deputized agents sa mga kadalanan nga di na kinahanglang maglibog pa. 

Karon nga nagping-it na sa kagrabe sa bul-og sa trapiko nga nasinati ug sa nagka-anam kadaghan nga sakyanan sa ingon gihapon ka gamay sa agi-anan, napalisud pa ang mga bulohaton sa mga traffic enforcers dala sa pagdaghan usab sa tigmaneho nga walay mga lisensya. 

Gani, subay sa namatikdan, mismo si Gob Edgar Chatto ang mibutyag sa iyang paglibot sa Bohol, daghan siya og makit-ang kabataan nga gamaneho nag mga sakyanan bisag tataw nga dili pa angayan. 

Kini usan nakatampo sa kadaghan sa disgrasya sa Bohol. 

Sa buwan sa Nobyembre pananglit, matud sa Kampo Dagohoy nga may nahitabo nga 8 ka kaso sa wala tuyua nga kamatayon, may pipila niini ang naangin sa kabataang walay lisensya. 

Matud ni PSupt Lorenzo Batuan, sa iyang taho ngadto sa konseho, niadtong samang buwan, 44 ka kaso sa traffic incidents nga naka-angin sa pagkadaut sa propiedad ang natala, samtang laing 123 ka kaso sa traffic ang naka-ingon sa pagka-angol.

Namatikdan sa Campo Dagohoy ang kinatibuk-ang 175 ka krimen nga daghan ang naglambigit sa mga tigmaneho nga walay lisensya, mga menor de edad ug mga sakyanang walay rehistro. 

Tinud-anay nga miangkon nga kuwang ang ilang mga tawo, ang Land Transportation Office pinaagi ni Information officer Florencio Balazuela mipadayag nga bisan og permi sila manakop, igo lang ang ilang mahimo ug dili gayud makasolbad sa kadak-on sa suliran. 

Nadugangan pa ang kahasul sa mga traffic enforcers dala sa balaod nga nagdili sa pagpaslak sa mga menor de edad sa bilangguan. 

Niini, si fiscal Delusa giphinumdom sa mga traffic enforcers: kasohi hinuon ang mga tag-iya sa mga sakyanang gimaneho. 

Matud niya, ang Traffic Code of the Philippines ug ang Penal code, may probisyones alang niini. 

Nagtuon ang PPOC nga kon madid-an sa mga kadalanan ang mga ilegal nga driver, o mga sakyanang wala marehistro, mas maluag ang kadalanan ug malikayan ang dugang mga disgrasya. (rac/PIA-7/Bohol)

Matud ni Prosecutor Macario Delusa, mahimo kasuhan ang tag-iya sa sakyanan nga gimaneho sa mga walay lisensya.  Kini, gituohan usab nga usa sa mga paagi nga kakunhoran ang mga sakyanang nagbahasbahas sa kadalanan nga gimanehoy way lisensya.  (rac/PIA-7/Bohol)