Limpyong coal-fired plants

labing barato'ng solusyon?

TAGBILARAN CITY, January 26 (PIA)--Sa mga mahimong gamiton nga baratong teknolohiya nga ikasarang sa panginahanglan sa gahum dagitab sa Bohol, ang paggamit sa limpyo nga teknolohiya sa uling pa gihapon ang labing sayun nga makasupply sa dinaghang koryente sa kubos nga presyo.

Kini segun sa personal nga pahayag sa usa ka nagtrabaho sa power sektor subay usab sa nakuha nga datus gikan sa Bohol Energy Development Advisory Group (BEDAG). 

Segun sa Bohol Power Supply Plan nga nahulma sa mga panagtigum sa BEDAG diin nahimong opisyal nga power management plan sa Bohol ang Bohol Island Power Development Plan (BIDPP), napamatud-an ang daku nga panginahanglan sa gahum dagitab sa sunod nga mga katuigan. 

Ang BEDAG natukod aron pangandaman na ang posible nga pagkaproblema na usab sa Bohol dala sa kuwang nga supply sa koryente sama sa nahitabo niadtong naputol ang supply sa Bohol nga gikan sa Leyte dala sa bagyong Yolanda. 

Gawas sa natural nga pagsaka sa panginahanglan sa gahum dagitab dala sa kaugmaran ug ekonomikanhong sa Bohol, ang pagsulod sa Business Process outsourcing companies ug ang pagbukas sa Panglao Airport magdala sa mga labing daling kakuwangan sa gahum dagitab dinhi. 

Segun sa mga tinubdan, niadtong 2013, miabut na sa 67 MW ang panginahanglan sa Bohol ug ang 87% niini gikuha gikan sa Leyte Bohol transmission line gikan sa Tongonan Geothermal power. 

Segun usab sa forecast sa BEDAG, dala sa suliran nga gibilin sa linog niadtong 2013, niadtong 2015, naa ra sa 64 MW ang natala nga total demand sa Bohol. 

Apan subay sa pagtuon sa BEDAG Technical Working group, magpadayon sa pagsaka ang panginahanglan sa supply sa koryente sa Bohol human sa 2015, ngadto na sa 75 MW sa 2019. 

Kini mas modaku pa gani kon matuman ang pagbukas sa Airport sa Panglao, subay sa mga panaghap.

Segun sa mga miduso sa ilang mga proposals alang sa lokal nga tinubdan sa gahum dagitab, tulo ka mamumuhunan ang may laraw sa pagtukod sa limpyong uling nga teknolohiya kansang mga laraw makasapal sa labing dali nga panginahanglan sa Bohol. 

Ang Global Business Power Corporation makahimo sa pagtukod sa 2 ka 40 MW o duha sa 40 MW power plant gamit ang teknolohiyang limpyong uling kon tugtan sa 2018. 

Ang WESTMIN makatukog usab og duha ka 16 o 25 MW nga planta sa susamang teknolohiya dinhi sa 2018. 

Sa laing bahin, ang Swiss company nga CENERTEC mahimong magsugod sa modular 20MW plant nagdto na sa 500MW plant apan kini mahimo usab nga dili sa Bohol tukoron og makabit lang ang Bohol niini. 

Gawas sa tulo, gitanyag sa JethroTech gamit ang hangin, solar, ug hydro nga mga teknolohiya apan kini igo lamang sa 200 watts o 1 MW nga supply. 

Miduso ang Sta Clara International Corporation sa laraw sa 8MW nga hydro nga planta sa Cantacoy Danao apan ang mga konsultants sa Bohol mibabag tungod kay kini maka-angon sa mga maolupyo sa Danao, mao nga 4MW na lang ang mahimo.

Ang Wildflower BioEnergy Inc misugyot sa 2 ka 10 MW nga supply pinaagi sa teknolohiyang biomass, samtang ang Green Earth Enersource makahimo sa 10MW nga duha ka hugna nga plantang proyekto. 

Hinuon, sa kasamtangan, mahal gihapon ang paggamit sa teknolohiyang renewable sama sa solar, wind lakip na ang biomass. 

Sa katikaran, usa ka taas nga opisyal sa industriya sa koryente mibutyag nga dako ug purohan nga ang limpyong teknolohiya sa uling maoy labing sayon nga itukod. 

Sa taas nga lanat sa panahon nga misinati ang nasud sa wala pa mahipno nga teknolohiya sa uling, daghan pa ang mituo nga hangtud karon, hugaw lang gihapon ang coal fired plants. 

Apan segun sa tinubdan nga naasa National Grid Corporation of the Philippines, mahimo nga panid-an ang kasamtangang mga planta sa Korea Electric Power Corporation (KEPCO) ug Cebu Electric Development Corporation (CEDC) sa Cebu aron pruebahan kon tinuod bang may mga bag-ong teknolohiya alang sa limpyo nga uling alang sa gahum dagitab. (rac/PIA-7/Bohol)

Ang KEPCO sa Naga Cebu usa sa mga planta sa gahum dagitab nga migamit sa bag-ong limpyo nga teknolohiya sa uling. Dinhi sa Bohol, tulo ka dagkong kompanya ang mipadayag sa ilang laraw sa pagtukod og planta sa uling dinhi, kana kon tugotan sa mga Bol-anon. (hulagway sa PDI)