Imelda Ubay midawat

og MPB gikan sa NGCP

TAGBILARAN CITY, January 26 (PIA)--Sa pag-abi-abi sa barangay sa katukoran sa importante nga sub-station sa National Grid Corporation of the Philippines (NGCP) didto sa barangay Imedla ug sa pag-atiman sa katawhan niini, usa ka Multi-Purpose Building (MPB) ang tanyag sa kompanya ngadto sa mga residente didto. 

Gidawat ni Kapitan Teodulo Cadorniga ang MPB nga gipabarug sumpay sa stage sa pangpublikong tunghaan sa Imelda Elementary School ug iya usab nga gitunol gilayon ang responsibilidad sa pag-atiman niini ngadto sa principal nga si Mary Jean Mirontos. 

Ang straktura nga ginama sa puthaw nga mga poste, atup nga galvaroof ug may pataban pa nga insulation mahimo nga lugar tapokansa mga taga Imelda ug sa mga magtutuon sa elementarya sa ilang mga kalihukan sa tunghaan, matud ni Kapitan Cadorniga. 

Ang Imelda maoy barangay sa Ubay nga gibarugan sa Substation sa 138KV nga supply sa gahum dagitab nga gikan sa Leyte. 

Gikan sa Imelda, mitadlas ang linya sa koryente pinaagi sa 252 ka tore nga puthaw aron dad-on ang koryente ngadto na sa Corella diin usab kini ipadangat sa mga power distributors pinaagi sa 69KV nga mga linya. 

Sa iyang pamulong, gisaysay sa hepe sa transmission lines sa NGCP sa Bohol ug Cebu nga si Engr. Jiuseppe Lomaad ang kamahinungdanon sa pagdawat sa Imelda sa substation.

Labaw pa, gitumbok usab ni Engr Lomaad ang kamahinungdanon sa tabang sa komunidad sa Imelda sa spagseguro sa seguridad ug pagpanalipod sa substation. 

Tungod niini, agi og pasalamat sa NGCP, usa ka MPB ang ilang gitanyag alang sa barangay, matud ni Engr Lomaad. 

Gnai, matud ni Ma. Rosette martinnez, ang tigpamaba sa NGCP, wala nila ibutyag ang bili sa maong building. 

Segun sa mga naniid, mahimong wala ihatag ang bili sa maong proyekto tungod usab sa kadaku na sa nahatag sa NGCP sa ilang lugar. 

Regular nga naghatag ang NGCP sa mga school supplies ug ginagmay nga abag alang sa kabataan sa tunghaan sa Imelda, matud ni Mary Jean Mirontos, principal, 

Gani, matud pa, gawas sa NGCP, napatukod ang tunghaan sa barangay gikan sa daghan usab nga abag sa mga pribadong tinubdan. 

Apan, mihangyo si Engr Lomaad sa mga taga didto sa pag-tabang sa pagbantay sa mga pasilidad sa NGCP tungod kay kon may binuang nga mahitabo sa Imelda, maangin ang tibuok Bohol. 

Niini, misaad usab si Kapitan Cadorniga nga iyang hiusahon ang mga katawhan sa barangay aron mas mapalig-on pa ang pagpanalipod sa mga pasilidad sa NGCP. (rac/PIA-7/Bohol)

Malipayon ang mga kabataan ug mga sakop sa Barangay Imelda nga midawat sa MultiPurpose Building nga gihatag sa NGCP agi og Corporate Social Responsibility sa barangay nga midawat sa 138KV substation sa kompanya. (rac/PIA-7/Bohol)