LTO: ilegal modifications sa 

mga sakyanan, atutokan na

TAGBILARAN CITY, February 2 (PIA)--Kon ang imong sakyanan adunay gihimo nga ilegal nga pag-usab o modification sa bisan hain niining dapit, nga nakasupak sa mga balaod sa panakyanan, magbantay sa dakop.

Ang pagtangtang sa mga tabon aron mahimong drag motorcycles, pagtaud sa tambotso nga bukas alang sa dugang kompresyon, pagpamuli sa mga suga, pagtaud sa nagkadaiyang kolor sa suga, kini pipila lang ka mga modifications nga gukdonon sa balaod.

Ang mga giingog modifications o pag-usab nga gihimo ug tan-awon sa tanang mga law enforcement units ug natungdang opisyales sama sa mga deputized traffic enforcers magtutok sa mga tataw nga physical change o alteration sa kasagarang desinyo sa Motor Vehicle nga unang gipagawas sa tigbuhat nga planta niini.

Pinaagi sa usa ka Memorandum sa Land Transportation Office (LTO) pinaagi ni Assistant Secretary Edgar Galvante, gimanduan na ang tanang mga Law Enforcement Units ug opisyales sa LTO ug mga kapolisan nga nakakuhag deputation orders sa paglakip na sa ilang regular nga pagpatuman sa balaod ang pagdakop sa mga sakyanan nga wala na masubay sa mga probisyones ubos sa tulo ka mga basehanan.

Matud ni Asec Galvante, ang mga sakyanan nga gipang-usab ug wala na mahisubay sa gibatbat sa Department of Transportation and Communication (DOTC) Department Order (DO) No. 2010-32 o ang paghiusa sa mga matang sa Motor Vehicle sa LTO ug sa LTFRB.

Dugang pa, basehan usab ang Administrative Order No. ACL-2009-018 nga nagrevise sa Administrative Order kabahin sa bag-o nga motor vehicle inspection System u paglatid sa mga gabayan sa pagpatuman niini, subay usab sa Joint Administrative Order sa Revised nga Schedule sa mga silot ug penalidad alang sa paglapas sa mga balaod nga naggiya sa Land Transportation.

Ang pagpagawas sa Memorandum, matud pa ni Galvante, dala na usab sa daghanang mga reklamo nga nahidangat sa LTO kabahin sa pisikal nga pag-usab sa mga parte sa sakyanan sama sa manobela, tambotso ug ubang mga pag-usab nga nakahimo sa sakyanan nga dili na luwas sa kadalanan (road-worthy).

Subay sa mga panaghap, gukdon na sa LTO ug sa mga traffic enforcers ang mga sakyanang nagtaud sa mga delikado nga accessories nga makasagabal sa ubang motorista sama sa ilegal nga mga suga, pag-usab sa gidak-on sa mga ligid, pag-usab sa dagway sa sakyanan gikan sa stock nga dagway niini gikan sa manufacturer.

Kon masakpan sa mga tinugyanan, gimandu sa Memorandum nga dili lang kuhaon ang lisensya ug rehistro or official receipt, apan isulod sa impound ang ilegal nga giusab nga sakyanan hangtud nga ikapahiuli na ang mga gipang-usab nga parte.

Bisan pa, ipaagi pa usab gihapon sa inspection sa Motor Vehicle Inspection Center, aron pagpamatuod nga dili delikado ang sakyanan padaganon sa karsada.

Kon makapasar ug makabayad sa mga silot subay sa gilagda sa traffic laws, anha pa buhi-an ang sakyanan balik ngadto sa tag-iya niini. (rac/PIA-7/Bohol)