SHS tourism facility sa Panglao

pun-an og P4M nga resturant

TAGBILARAN CITY, February 7 (PIA)--Sa dili madugay, mobarug na usab ang P4 milyones nga resturant nga bansayanan sa mga kabataan mikuha sa Senior High school (SHS) sa Lourdes National High School (LNHS) sa Panglao. 

Kini dungan sa pagsubo usab sa P5 milyones nga Tourism Facility nga pipundohan sa Kagamhanang Probinsyal sa Bohol pinaagi sa Special Education Fund (SEF) ug giabagan sa Department of Education (DEP-ED), mga pribadong resorts sa isla nga resort sa Panglao ug mga pribadong grupo.

Butyag ni Dr. Wilfreda Bongalos, ang mga pasilidad maoy labing una sa tibuok nasud ug gamiton aron personal nga mabansay ang mga nagtungha sa Senior High School sa Lourdes National High School (LNHS) sa nga gimbuhaton sa turismo ilabi na sa natumbok nga abilidad sa pag-alagad sa turista. 

Usa ka Senior High School Learning Facility nga sama sa usa ka hotel apan may tulo lamang ka kwarto nga katulganan nga susama sa kwarto sa usa ka resort, reception lobby ug sama sa front desk, kan-anan ug andamanan nga kusina ang naabot sa P4 M nga gipahat sa kagamhanan. 

Ang tulo ka mga lawak gi furnish sa tulo ka mga inila nga resorts sa Panglao, ilawom sa diwa sa tinabangay. 

Ang inila nga Bohol Beach Club ang miangkon sa pagpuno sa fixtures sa room 1, ang South Palms usab ang midevelop sa ika duha nga lawak samtang ang Mithi Spa sa Panglao Island Nature Resort ang nagdevelop sa ika tulo nga lawak. 

Sa laing bahin, ang lobby ug front desk giatiman sa Amorita Resort samtang ang kusina gifurnish usab sa Municipality sa Panglao. 

Ang pasilidad kalakip sa Turo-Turismo nga namugna human sa Education Summit pinaagi sa DepEd Bohol, lalawigan sa Bohol, munisipyo sa Panglao, Asia Foundation, Coalition for Change in Education ug ang Bohola Association of Hotels Resorts and Restaurants. 

Kahinumduman nga sa pagpatuman sa sa junior ug senior high school subay sa K12 program sa DepED, giduso sa Bohol ang duha ka kurso alang sa mga magtutuon nga buot mahimong espesyalista sa mga buhat pangalagad sa turismo ug sa agrikultura. 

Samtang padayon pang giugmad ang pasilidad sa agrikultura sa didto sa San Pascual Ubay, gisubhan na niadtong Biyernes ang pasilidad sa Lourdes National High School sa Panglao. 

Sa nahuman nga mga lawak nga pagahimo-an sa practicum sa mga estudyante alangs a house-keeping, itukod na usab ang usa ka restaurant ug conference hall agi og dugang sa SHS tourism Learning facility. 

Matud ni Dr Bongalos, ang resturant isumpay sa kusina sa tunghaan ug maoy bansayanan sa mga kabataan kabahin sa fine dining ug high end nga mga bankete. (rac/PIA-7/Bohol)

Gipangunahan ni Gob Edgar Chatto, uban sa mga opisyales sa lalawigan, Superintendent Wilfreda Bongalos, BM Alexie Tutor, Panglao Executive Assistant Noel Hormachuelos, mga tinugyanan sa Amorita ug South Palms ang pagtukas sa tabil alang sa P4 Milyones nga  restaurant sulod sa  Lourdes National High School isip bansayan sa mga Senior High school nga nagtuon sa kursong turismo. (rac/PIA-7/Bohol)