Lumba sa MTB: Kinatkatay 

sa Binabaje sa Domingo na 

TAGBILARAN CITY, February 7 (PIA)--Bohol Sa Domingo na pohon, Pebrero 12 sa alas 9 sa buntag mahibaw-an kon may katungod ba gayud ang Bohol nga moangkon sa "It's All In Bohol" tagline ilabi na kon ang hisgutan, ang dili kasarangan nga natad sa mountain biking. 

Gani, segun sa mga tigpasiugda, ang Ika duha nga Alicia MountainBike Festival, dili kaayo haum alang sa amateur mga manikaray, dala na sa extreme nga abilidad nga gikinahanglan alang sa lumba.

Gipaila nga "Kinatkatay sa Binabaje," ang lumba sa bisekleta nga mountain bike gipakadak-an ang hinay-hinay nga pagtungas sa mga kabungturan sa Binabaje, barangay Cambaol sa Alicia. 

Ang 15 ka kilometro nga lumba-anan may mas taas nga patungas (uphill climb) kon itandi sa padulhog (downhill), matud ni ALicia Tourism Officer Godelia Lumugdang. 

Ang lumbaanan mga agi-anan sa mga tigpatugway sa hayupan subay sa bukobuko sa mga bungtod nga kacogonan, ug ang mga dulhogon halos wala kaayoy bato apan lisud gyud alang sa amateur, segun pa sa mga nakahimo na sa pagtrack-read. 

Ang kinatkatay hinuon dali ra nga bawi-on ang kakapuy kon makita na ang talan-awon sa kinatibuk-ang wanang sa tumoy sa bukid sa Alicia. 

Ang kasamtangan nga lumbaanan mahimo alang sa extreme cross country (XC), all terrain, enduro, free ride o downhill bikes paran mas angay pangandaman ang tag-as nga tungason nga seguradong pagsuway sa kalig-on ug kakusgan sa mosikad, dugang ni Lumugdang. 

Dala sa lisud nga ruta, ang mga tigpasiugda nagbutang nag mga waivers ug kasabutan sa lumba, sa pagpaneguro nga ang mga mosalmot nakasabut sa panginahanglan nga may igo nga bansay ug kaya sa iyang lawas. 

Ang lumba buksan sa mga kategorya nga elite open, 45 anyos pataas, all Bohol ug mga bag-ong salmot (beginners). 

Ang registration fee naa ra sa P300.00 ug naglakip na sa tshirt, ug mahimo moregister sa Alicia Unfolds sa Facebook. Didto may pamaagi unsaon pagpadala ang kwarta pangrehistro. 

Samtang Pebrero 8 na ang deadline alang sa buot nga may makuha nga tshirt dayon human sa lumba, ang maulahi mahimo gihapon nga moregister sa adlaw sa lumba apan dili na maseguro ang tshirt nga makuha. 

Wala may lakip sa registration and pagkaon, gipaneguro sa mga tigpasiugda nga may mga pagkaon nga mapalit didto sa lumba-anan.

Kdatog mosalmot sa lumba nga nanginahanglan og kahigdaan kinahanglang mopahibaw sa organizers, aron magahinan sa mga higdaanan sa classrooms, sa kabalayan isip home stay ug sa camp sites kon ang mosalmot may mga tents.

Kadtong moapil nga dili taga Bohol derecho na nga apil sa open elite category, segun sa organizers.

Ang ika duha nga Alicia Mountain Bike Festival gialayonan sa Bohol Provincial Tourism Council, Bohol Tourism Office dala sa panglantaw nga ang mountain biking usa na usab ka produkto nga pangturismo sa Bohol. 

Matud ni Alicia mayor Marnilou Ayuban, ang Alicia Mountianbik Festival prueba nga ang Bohol dili lamang Chocolate Hills, Panglao beaches, Loboc Rivercruise, mga karaang simbahan ug suroysuroy sa mga komunidad. 

Dugang niya, ang Alicia migamit sa mountainbiking isip paagi aron ikapakita ang natural nga kaanyag sa kabukiran sa lungsod isip maoy usa ka paagi sa pag-aghat sa katawhan nga panalipdan ang kabukiran. (rac/PIA-7/Bohol)

Di na gyud kapugngan, bisan ang mga bikers dili na makapugog sa pagpahulagway sa race course sa Binabaje, bisan pa sa tag-as sa mga tungason niini, ang pagpahuway sa tumoy sa mga bungtod dali nga bawos alang niining kasakit. (rac/PIA-7/Bohol)