Red carpet welcome giandam

Sa Bohol alang sa ASEAN ‘17

TAGBILARAN CITY, February 6 (PIA) –Giandam sa Bohol ang usa ka “red carpet welcome” alang sa umaabut nga mga bisita nga gikan sa Association of South East Asian Nations (ASEAN).

Gani subay niini, human sa tulo ka hugna sa mga tigum tali sa gobernador ug sa mga tinugyanan sa National Organizing Committee (NOC) nga gipangunahan ni Ambassador Marciano Paynor Jr, nagpatawag nag unang coordination meeting si Gob CHatto ngadto sa tanang ahensya sa nasudnong kagamhanan nga may kalambigitan sa pagseguro sa malampuson nga hosting sa ASEAN. 

Kahinumduman nga sa miagning buwan, gidawat ni Presidente Rodrigo Duterte ang responsibilidad sa Pilipinas isip host sa ika 50 nga tuig katukoran sa ASEAN. 

Ang ASEAN us aka tinabangay sa napulo ka mga nasud aron iduso ang hiniusang paningkamot alang sa economikanhon ug politikanhong alayonay pinaagi sa bukas nga hisgutay sa mga sakop niini. 

Lakip sa ASEAN ang Brunei, Cambodia, Indonesia, Laos, Malaysia, Myanmar, Pilipians, Singapore, Thailand, ug Vietnam.

Kini ang ikatulo nga ASEAN summit nga mahitabo sa Pilipinas. 

Kahinumduman nga ang unang ASEAN Summit sa Pilipinas nahitabo sa termino ni Presidente Corazon Aquino niadtong 1987 didto sa Manila. Nasundan usab kini sa panahon ni Presidente Gloria Macapagal Arroyo didto sa Sugbo niadtong 2007. 

Matud ni Gob Chatto, swerte ang Bohol nga napili nga usa sa pipila lamang ka nga lalawigan nga makahigayun sa pagdawat sa mga high level nga mga ministro ug senior officials sa nagkadaiyang nasud. 

Ang ASEAN Senior Officials meetings adto himoon sa us aka resort sa Panglao ug buot sa Kapitolyo nga hipno ug walay sami sa mansa ang pagpangandam alang niini. 

Partikular nga gihisgutan ang mga buhatonon kalabut sa pagtugpa sa mga sakop sa ASEAN gikan sa mga advance parties ngadto nga sa pagbiya sa katapusang sakop sa panon. 

Gilakbitan sa mga hisgutanan sa meeting nga gipreside bi Provincial Administrator Alfonso Damalerio II ang kahimtang sa mga pangturismong suroyanan, nga pansayan niini, mga pasilidad ug ang imprastraktura. 

Gisuhid usab ang panginahanglan sa seguridad lakip na ang pagpakita sa limpyo nga mga agi-anan ug responsableng mga residente nga magatiman sa ilang mga iro.

Tungod niini, gimandu-an ni Chatto ang mga mayores nga kansang mga lungsod seguradong suroyan sa mga sakop sa ASEAN sa pagpanglimpyo.

Gamita ang inyong mga police powers, tambag ni Chatto ngadto sa mga opisyales nga gilauman nga magbuhat sa angayang himoon aron malampuson ang pag-abi-abi sa Bohol. (rac/PIA-7/Bohol)

GITIGUM ni Gob Edgar Chatto ang mga ahensya sa kagamhanan nga may ikatampo alang sa malampusong pag-abi-abi sa mga bisita sa ASEAN, samatang iyang gipanawagan ngadto sa mga mayor sa mga lungsod nga mangandam, manglimpyo ug ipaabut sa katawhan nga magpiyesta alang sakasaulogan sa paghigalaay ug alayonay sa mga nasud. (rac/PIA-7/Bohol)