Brown-out alang sa Sabado, 

gisibug ngadtos 24, -NGCP

TAGBILARAN CITY, June 15 (PIA)--Gipahibalo sa National Grid Corporation of the Philippines (NGCP) ning bag-o lamang, nga ila nga isibug ang ilang maintenance activities nga himoon unta sa Sabado, Hunyo 17.

Kon wala pa masibug ngadto sa Hunyo 24 o sa sunod semana, mapagan ang kalihukan sa lungsod sa Catigbian sa ika 13 nga Katigbawan Festival ug ika 68 nga kasumaran sa katukoran sa lungsod.

Una na nga gipahibaw sa NGCP ang ilang pagahimoon nga maintenance activities nga makaapekto sa pipila ka bahin sa Bohol sa Sabado, Hunyo 17.

Sa Sabado, mahitabo didto sa Catigbian ang gikahinaman nga Carabao Parade, ang Veterinary Clinic ug Services ug ang paghukon sa mga Exhibits, ang Carabao Talent Show, Pig Catching, Livestock Seminar and Cooking Contest ug awarding ceremonies sa AgriFair ug sa Toboy.

Tungod kay ang maintenance activities makaapekto sa Macaas substation sa BOHECO 1, direktang apektado unta ang mga kalungsuran sa nga gialagaran sa Macaas Substation, ilabi na sa 12 ka oras unta nga brown out.

Ang pagkapawong sa serbisyo sa suga nga dagitab mahitabo unta sugod alas 5 sa buntag ngadto sa alas 6 sa hapon, kon nadayon pa.

Kini tungod kay magpuli ang NGCP sa mga poste nga nadugta na og ang mga babag nga nangagabok na ilabi na sa nagkutay nga Corella-Tubigon 69kV nga linya.

Niini, ang BOHECO una na usab nga mipahibaw sa mga lugar nga maapektohan sa pagkapawong sa suga.

Hinuon, tungod sa pagkonsidera sa hangyo sa mga maapektohan, gibutyag sa corporate nga tigpamaba sa NGCP nga gisibog na ang schedule sa pagkapawong sa serbisyo.

Matud ni Betty Martinez, ang gikaschedule nga brown-out mahitabo sa Hunyo 24 na pohon sa susamang oras. (rahc/PIA-7/Bohol)