Katigbawan Festival sa ika

68 nga sumad sa Catigbian

TAGBILARAN CITY, June 15 (PIA)--Buksan na usab ang ika 68 ka tuig nga kasumaran sa katukoran sa lungsod sa Catigbian pinaagi sa ika 13 nga kasaulogan sa Katigbawan Festival, Hunyo 16 ngadto sa 18.

Ang Katigbawan, minugbo sa Katagbawan, kabawan ug tigbaw ug tingusbawan, mga pulong nga nahimo nang giya ug abayan sa lungsod sa iyang pag-ugmad. 

Apil sa mga highlights sa kasaulogan ang pagtugyan ngadto sa lokal nga pangagamhanan sa mga proyektong gipunduhan sa Bohol Earthquake Assistance Funds nga nahuman nag patuman. 

Kini naglakip sa pagpanalangin sa bag-ong munisipyo sa lungsod, matud ni Sangguniang Bayan Secretary Ardesa Estavilla. 

Magsugod ang mga kasaulogan sa santos nga misa uban ni Rev. Fr. Marcos A. Caballo sa Immaculate Mary Parish Church ug sundan kini sa Foundation Days Opening Parade nga tambongan sa kadaghanan sa lungsod gikan sa Merkado ngadto sa Catigbian Cultural and Sports Center (CCSC), diin himoon ang programa ug buksan ang AgriFair. 

Ang lungsod sa Catigbian dugay na usab nga naghandum nga ilhon nga capital sa mga prutas ug lagutmon sa Bohol ug mahimong kini maoy angay nga bantayan sa AgriFair.

Gipaabut nga motambong didto sila DILG Regional Director Atty. Rene K. Burdeos, Gob. Edgar M. Chatto, Bise Gob. Dionisio Balite, Kongresista Rene L. Relampagos, Board members Venzencio Arcamo, Abeleon R. Damalerio, Ricky Masamayor. 

Adto usab ang lokal nga opisyales sa lungsod pinangulohan ni Eayor Virgilio L. Lurot, Vice Mayor Necita N. Digaum, mga konsehales, hepe sa mga buhatan sa lungsod og mga kapitan. 

Pagka hapon, mahitabo ang gikahinamang Kuradang Showdown nga apilan sa unom ka mga high schools sa lungsod. 

Sa pagka gabii, himoon sa alas 7:30 ang Talent Night, sa Miss Katigbawan 2017 didto sa Catigbian Cultural and Sports Center. 

Sa Sabado, magbukas sila sa naandang Livestock Day nga sugdan sa Carabao Parade sa alas 8:00 sa buntag. 

HUman usab niini, buksan ang Veterinary Clinic and Services ug Judging of Exhibits sa alas 9:30 didto sa CCSC samtang mangandam ang tanan alang sa alas 10:00 nga Carabao Talent Show, Pig Catching, Livestock Seminar ug Cooking Contests. 

Sa pagka gabii sa mahitabo sa alas 7:30PM ang Coronation Night sa Miss Katigbawan 2017, dugang ni Estavilla. 

Gawas sa daku nga potensyal sa agrikultura nga dala sa Katigbawan, mipadayag si Estavilla nga usa usab ka dakung lakang sa turismo sa lungsod ang paghandum, gawas pa nga kini adlaw sa pagpasalamat sa lain na usab nga katuigan nga ilang nakab-ut. (rahc/PIA-7/Bohol)