Byahe sa eroplano pa

Tagb-Cebu, duha na

TAGBILARAN CITY, June 16, (PIA)--Gikan sa wala gyuy bisag usa, human sa pipila na ka tuig ang minglabay, duha na hinuon ka eroplano ang magtanyag og air service sa rota nga Tagbilaran Cebu sugod sa sunod semana. 

Kini human mipahibaw ang Philippine Airlines (PAL) and nasudnong flag carrier, nag ila na nga ibutang ang usa ka Airbus 320 aron moalagad sa Tagbilaran-Cebu (Mactan)-Tagbilaran sugod sa Hunyo 22. 

Ang eroplano sa PAL mogikan sa Tagbilaran Airport sa alas 7:00 matag adlaw paingon sa Mactan ug mogikan sa Mactan Cebu sa alas 3:30 paingon sa Tagbilaran, segun sa brochure nga gipatik sa PAL ug gipasapasa na karon sa internet. 

Matud sa PAL, ang pletehan sa Cebu ngadto sa Tagbilaran naa sa P 1,125 hangtud sa Octubre 15 nga booking ug P825 ang gikan sa Tagbilaran paingon sa Mactan. 

Sa laing bahin, usa ka gamay nga eroplano, ang AirJuan, nagtanyag usab sa ilang byahe gikan sa Mactan paingon sa Tagbilaran sa matag alas 8:20 sa buntag ug alas 3:40 sa hapon. 

Mogikan usab kini nga eroplano sa Tagbilaran paingon sa Mactan sa matag alas 9:10 sa buntag ug alas 4:20 sa hapon. 

Ang AirJuan nga migamit sa Cessna Grand Caravan nga eroplano may 9 lamang ka pasahero ug mangobra sa pletehan nga P888 gikan ug paingon sa Tagbilaran, matud ni GlendaCorvera, customer service specialist sa Air Juan. 

Gipasalig usab sa nag-unang kompanya sa nasud nga nagtanyag sa mga seaplanes, nga ang ilang pletehan nagsukip na sa buhis, insurance ug napulo ka kilo nga bagahe. 

Alang sa pagkuha sa tickets, mahimong moadto online sa www.airjuan.com diin adyo lamang mahimo ang ilang bookings sa pagka karon, dugang ni John Gutierrez, tag-iya sa Chief Executive Officer sa kompanya. 

Gipasabut sa AirJuan, nga ang serbisyo nga Tagbilaran-Mactan makuha lamang sa 20 minutos, kon itandi sa halos susamang presyo sa fastcraft nga molanat og duha ka oras ang byahe. 

Niini, gilauman sa mga Bol-anon nga mas daghan pa ang turista nga makasinati sa Bohol sa pagbukas sa duha ka serbisyo sa panakyanan sa kahanginan. 

Ang pagdaghan sa turista gipaglantawan nga makaayo usab sa ekonomiya sa lalawigan dala sa kwarta nga mamahimong puhunan human sa paggasto sa mga turistang manuroy sa Bohol. (rahc/PIA-7/Bohol)

Duha ka eroplano, usa ka destinasyon; Sugod sa sunod semana, motanyag na usab ang Philippine Airlines sa serbisyong Tagbilaran-Cebu human kini nila biyae sa dugay na nga panahon. Sa laing bahin, ang AirJuan nagbukas na sa ilang serbisyo sa Tagbilaran Cebu (Mactan) (rahc/PIA-7/Bohol)