Amended Anti-Money Laundering 

Act, gilagdaan na ni Duterte

MANILA, July 20--Sakop na usab sa Anti-Money Laundering Act bisan ang mga casino operations sa nasod.

Sa Republic Act 10927 nga gilagdaan ni Presidente Rodrigo Duterte, nakalatid nga mahimo nang imbestigahan sa Anti-Money Laundering Council (AMLC) ang mga casino apil ang ilang internet ug ship-based casino operations nga adunay transaksyon nga molapas sa P500,000 sulod sa usa ka banking day.

Sakop usab niini ang pag-imbestiga sa mga single casino cash transaction nga molapas sa P5 milyon o kapareho niini sa ubang currencies.

Ubos usab sa amended version sa Anti-Money Laundering Act, may gahom na ang AMLC nga i-freeze ang salapi ug katigayonan sa casino nga gidudahang gikan o nalambigit sa ilegal nga transaksiyon o aktibidad, agi og pagsunod sa ipagawas nga freeze order sa korte.

Kini tungod kay ang mga bangko lamang ang sakop sa balaod ug sa gahom sa AMLC kun itandi sa daang balaod.

Ang gi-amyendahang balaod mahimong epektibo kinse ka adlaw human kining matala sa official gazette o sa mga nag-unang pahayagan. (ecb/PIA7-Bohol)

================

Catigbian, gitay-og og 

magnitude 3.6 nga linog

TAGBILARAN CITY, July 20--Gitay-og og magnitude 3.6 nga linog ang lungsod sa Catigbian, ning lalawigan sa Bohol.

Nahitabo ang pagtay-og mga 9 kilometros habagatang bahin sa lungsod sa Catigbian mga alas-4:18 ganinang kadlawon, adlaw’ng Huwebes.

Natala ang intensity 1 sa Cebu City tungod sa maong linog.

Matud pa sa Philippine Institute of Volcanology and Seismology (Phivolcs), wala man kini gipaabot nga magdala og kadaot ug aftershock.

Kagabii, gitay-og usab og magnitude 3.5 nga linog ang Sarangani, Davao Occidental mga alas-11:28 sa gabii.

Sa wala pa kini, gitay-og usab og magnitude 3.3 nga linog mga alas-11:08 sa gabii ang lungsod sa Calatrava sa Romblon. (ecb/PIA7-Bohol)