Smoking ban sa tibuok nasod,

epektibo na sa Hulyo 22

TAGBILARAN CITY, July 21--Sa Sabado, Hulyo 22 na sugdan ang pagpatuman sa smoking ban sa tibuok nasod agi og pagsunod sa Executive Order nga una nang gilagdaan ni Presidente Rodrigo Roa Duterte bisan wala pa’y Implementing Rules and Regulations (IRR) alang sa maong EO.

Sugod niining adlawa, dili na mahimong mogamit, magbaligya ug mopalit og mga tobacco products sa mga pampublikong lugar.

Matud pa ni Department of Health (DOH) Assistant Secretary Eric Tayag, makaayong magbutang na og mga “No Smoking” signs ang mga tag-iya og mga establisyimento aron makalikay sa violation.

Alang sa may kayang magbutang og mga smoking area, kinahanglang magbaton og gitawag nga buffer zones o ‘mga kwarto taliwala sa smoking area ug public area’, kini aron masalo ang aso ug dili dayon makaabot sa public area ang baho sa sigarilyo gikan sa mga smoking zones.

Matud pa ni Tayag nga kun walay buffer zone, makaayong dili na lang magbutang og smoking area tungod kay ikonsiderar kini isip violation.

Sa mga masakpang molapas sa smoking ban, may tukmang multa nga P5,000 ug upat ka buwang pagka-bilanggo. (ecb/PIA7-Bohol)