Wala'y lugak nga kampanya sa 

illegal drugs gipasalig sa SONA

TAGBILARAN CITY, July 25, (PIA)--Way lugak nga pagpakig-batok sa ilegal nga drugas, kini maoy bahad ni Presidente Rodrigo Duterte sa iyang ika duha nga pagbatbat sa State of the Nation Address (SONA) Julyo 24.

Gipadayag sa Presidente atul sa iyang ika duha nga tuig sa pagpapangulo human napili sa bagang mayoriya sa mga Pilipino nga mituo siya nga mokagar gayud ang kaugmaran ug kalambuan kong may mga kriminal.

Iya usab nga gitumbok nga kon ang ilegal nga drugas ug ang mga migamit niini magpadayon nga gawasnong magbagdoy sa kadalanan ug mamiktima nga way kukahadlok sa mga inosente, walay kaugmaran nga molahutay.

Gani, dala sa pagkahungog sa drugas ug kriminalidad, diha pay mga higayon nga ang mga gisaligang maoy tigpanalipod sa katawhan, sila ra usab mismo ang naghimo sa krimen nga mao untay ilang sumpoon, pasabut sa 72 anyos nga Presidente.

Basi sa iyang kasinati-an sa Davao, ang kompyansa sa mga mamumuhunan palig-onon lamang kon adunay gamhanan nga kusog ug kasaligang mekanismo alang sa pagpanalipud sa katawhan ug sa langyang puhunan, matud niya.

Iya usab nga gisaysay nga ang ekonomiya mosulbong gayud kon adunay kahusay ug kalinaw nga magpatigbabaw sa usa ka lugar og dinhi ikabubo ang pamuhunan.

Niini, gitataw sa isug og motinuod gayud nga Presidente nga iyang gisaad nga bisag unsay mahitabo ug unsay dangatan, ang pagpakigbisug batuk sa illegal drugs magpadayon tungod kay kini maoy gamot sa daghanang panuway ug pagsakit.

Kini usab, dugang niya, makapagabuk sa katilingbanung pagbugkosay ug magpugong sa pagsulod sa puhunan ang drugas og kriminalidad.

Bahad niya: pagpakigbatuk niini sa way paglubad ug way puas.

Gani, bisan sa sa international ug local nga pressures, ang pagpakig-away dili undangon hangtud nga ang mga nalambigit niini makasabut nga ang ilang padulngan: prisohan na lamang og kamatayon, ingon siya.

Dugang panghulga sa Presidente, iyang ipasalig nga kon magpadayun sa ilang patigayun, dili gayud nila matagamtam ang ilang ganansya sa ilang kahakug og kabuang.

Gawas nga gipanaad sa Presidente nga dili niya luagan ang kampanya ilabi na dili niya tugotan nga mapildi sa kampanya, gipaambit usab niya nga wala siyay tuyo nga apilan ang pagkapukan sa mga batan-ong Pinoy sa iyang pagmakuli sa iyang mga hukom ug angay buhaton.

Sa mga tigpanaway gani, iyang gitambag nga inay basolon ang kagamhanan sa pagpamatay, maayo pang gamiton ang ilang impluwensya, moral nga otoridad ug pagpasunod nagdto sa mga kahugpungan ug pagtudlo sa katawhan sa epekto sa ilegal nga drugas.

Bisan pa man, gihatagan pa og pagduon sa Presidente nga iya usab nga gitahud ang kinabuhi sa uban sama sa pagtahud sa iyang kaugalingong kinabuhi.

Niya pa, sa matag kinabuhi nga makutlo, kini nagtumbok sa kaugmaon nga gipatay usab. (rahc/PIA-7/Bohol)