Mas sayo nga therapy, 

mas makaayo sa bata

TAGBILARAN CITY, August 1, 2017 (PIA) --Mas sayo nga rehabilitasyon sa mga kabataan nga may suliran sa normal nga pagpanglihok-lohok, mas makaayo. 

Kini maoy gisaysay sa usa ka occupational therapy (OT) ug physical therapist (PT) didto sa Kapihan sa PIA nga nagsaulog sa National Disability Prevention and Rehabilitation Week (NDPRW) sa ikaduhang semana sa Hulyo. 

Si Gligen Nistal, occupational ug physical therapist sa Bohol Stimulation Therapeutic Activity Center (STAC) mibutyag nga kon madugay og patan-aw ang mga bata nga may mga timailhan sa suliran, hayan malisdan na usab hinuon ang pagpahimo sa therapy niini. 

Gani sugyot niya, sa labing dali nga panahon, ipatan-aw ang bata sa espesyalista aron kahimoan na sa tukmang programang ikapasunod. 

Ang mga espesyalista mao na unya ang mohatag sa referrals kon unsa'y maayo alang sa bata. 

Alang sa mga kabataan gikan sa mga kabus nga masayrang may panginahanglan alang sa physical og occupational therapy, o sa Special Education (SPED), mahimo na nga dalhon sa mga ginikanan ngadto sa labing duol nga STAC aron mapailawom dayon sa tukmang proseso. 

Sa mga kabataan ansang mga ginikanan may igo nga ikagasto, may mga pribadong serbisyo sa physical og occupational therapy samtang may nga libre nga SPED nga klase sa mga pangpublikong tunghaan. 

Matud ni Nistal, daghan na nga mga kabataan Bol-anon ang ilang napahiuli, gani daghan na ang nakaeskwela na ug nitipo na sa ilang ga ka-edad sa mga tunghaan. 

Kana human sila nakalingkawas sa kalisud dala sa therapy nga nakapahiuli sa mga unod ug bukog nga dili unta epektibong makontrolar sa bata. 

Gawas sa occupational ug physical therapy ug SPED, naa usab sa STAC ang mga nutritional feeding programs, dugang ni Nistal. 

Ang STAC sa Bohol naa usab sa Batuan, Tubigon, Jagna ug sa Ubay, panapos ni Nistal. (rahc/PIA-7/Bohol)