Dugang benepisyo alang sa mga 

senior citizens, gihikyad sa Philhealth

MANILA, Sept. 12 (PIA)--Gipahayag sa pamunoan sa Philippine Health Insurance Corporation (Philhealth) ang ilang mas gipalig-on nga kalabotan sa Philippine Society of Geriatrics and Gerontology (PSGG).

Kini pinaagi sa mas gipalapdang coverage sa mga tabang nga gigahin alang sa sektor sa mga tigulang sa atong katilingban.

Sa iyang mensahe sa bag-o lang gipahigayong 5th Annual Convention sa PSGG nga nagdala sa temang “Saklolo, Saklola”, miingon si Philhealth Chief Executive Officer Dr. Francis Pargas nga mas nakatutok karon ang maong ahensiya sa kaayohan sa mga lolo ug lola sa nasod. 

Sa maong panagtapok sa PSGG nga gilangkoban og mga doktor, nurses ug allied medical professionals, gipasigarbo sa opisyal ang mas gipalapdan nga sakop sa financial risk protection ug mga gikinahanglang health services.

Gawas sa mga regular lifetime members sa Philhealth, sakop na usab sa health services sa ahensiya ang mga lolo ug lola isip parte sa National Health Insurance Program (NHIP) ubos sa R.A. 10645.

Ang mga tigulang nga Philhealth members apil na usab ang ilang mga legal dependents, mahimong makapahimos sa mga mosunod nga programa.

Apil niini ang Pneumonia-High Risk (P32,000.00), Hypertension – Stage II (P9,000.00), Osteoporosis – Unspecified (P7,900.00), Osteoarthritis (P7,000.00), kauban ang uban pang Vascular Dementia (P7,800.00), Cardiac Arrhythmias (P12,200.00), Congestive Heart Failure (P15,700.00), Chronic Obstructive Pulmonary Disease (P12,200.00), Myocardial Infarction (P12,000.00), Complications of Diabetes Mellitus with other specified complications (P12,600.00) ug Asthma o Hubak (P9,000.00).

Matud pa usab sa pamunoan sa Philhealth nga mas daghan pa silang ihikyad nga mga benepisyo alang sa ilang mga miyembro sa mga mosunod nga panahon. (ecb/PIA7-Bohol)

=================

Ban sa pagsuot og high-heels 

sa trabaho, gipatuman na

TAGBILARAN CITY, Sept. 12 (PIA)--Gipatuman na sugod niadtong Lunes, Setyembre 11 ang pagbawal sa mga trabahanteng babaye sa pagsuot og high heels nga sapatos sa ilang trabaho ilabi na sa mga sales lady. 

Kini pinaagi sa direktiba nga gipagawas sa Department of Labor and Employment (DOLE) tungod sa giingong dili maayong epekto sa pagsuot og high heels sa kahimsog sa kababayen-an.

Nakalatid sa Department Order 178 ang paghatag og 15-minutos nga ‘sitting break’ o oras sa paglingkod matag duha ka oras sa mga babayeng kawani sama sa mga sales ladies, waitresses, receptionists, lady guards ug flight attendants.

Multa, supensiyon o pagpasarado sa negosyo ang atubangon sa mga employer nga molapas sa maong kamanduan sa DOLE. (ecb/PIA7-Bohol)