Presidente Duterte, may 

gitudlo nang OIC sa DAR

MANILA, Sept. 11 (PIA)--Gitudlo ni Presidente Rodrigo Duterte si Undersecretary Rosalina Bistoyong isip officer-in-charge sa Department of Agrarian Reform (DAR).

Matud pa ni Presidential Spokesman Ernesto Abella nga sa mando ni Presidente Duterte, gilagdaan ni Executive Secretary Salvador Medialdea ang appointment paper ni Bistoyong.

Si Bistoyong ang kasamtangang ihulip ni kanhi DAR Kalihim Rafael “Ka Paeng” Mariano nga padayon nang gi-reject sa Commission on Appointments (CA).

Matud pa sa Malakanyang, gitudlo si Bistoyong isip DAR OIC aron masisuro ang epektibong paghatod sa serbisyo-publiko sa maong ahensiya.

Si Bistoyong baynte otso ka tuig nang nag-alagad sa gobyerno ug kasamtangnag Undersecretary sa DAR sukad pa niadtong 2010.

Gi-ila siya nga mi-suporta sa agrarian reform beneficiaries ug indigenous peoples (IPs), gawas pa sa pagtabang sa mga kanhi landowners ubos sa programang Comprehensive Agrarian Reform Program (CARP). (ecb/PIA7-Bohol)

================

DOH, DOLE ug OWWA, milagda og MOA alang 

sa OFW wings sa mga pampublikong ospital

MANILA, Sept. 11 (PIA)--Gilagdaan na ni Department of Health (DOH) Kalihim Paulyn Jean Ubial ug mga tinugyanan sa nagkalain-laing ahensiya sa gobyerno sama sa Department of Labor and Employment (DOLE) ug Overseas Workers Welfare Administration (OWWA) ang Memorandum of Agreement alang sa pagbutang og Overseas Filipino Workers wing o ward sa mga pampublikong ospital sa tibuok nasod. 

Tumong niini nga makahatag og libreng medical assistance sa mga OFW ug mga pamilya niini.

Sa pagkakaron, gibutyag sa DOH nga gimugna pa ang implementing guidelines aron matumbok kun kinsa ang mahimong makakuha og benepisyo.

Ang pondo alang sa pagpahimo sa mga OFW wing kuhaon gikan sa P164 bilyon nga pondo sa DOH ubos sa Hospital Facility Enhancement Program.

Una nang naaprubahan ang pagpatukod sa unang OFW wing sa Jose B. Lingad Memorial Regional Hospital sa Pampanga nga usa sa mga lugar nga may pinakadaghang OFWs nga namuyo.

Kini adunay kapin sa singkuwenta ka mga lawak alang sa mga OFW ug opisyal na kining pagabuksan sa katapusan ning buwan.

Padayon karon ang pakig-alayon sa DOH sa uban pang pampublikong ospital sa nasod ug target niining makabutang og OFW ward sa kapitoan nga mga tambalanan sa pagtapos ning tuig.

Samtang parte usab sa gilagdaang MOA ang pagsugot sa POEA ug DOLE nga dawaton isip valid requirement ang mga resulta sa pre-employment medical examinations gikan sa mga pampublikong ospital aron makadaginot ang mga gustong mo-trabaho sa ubang nasod. (ecb/PIA7-Bohol)

================

FDA, nipasidaan batok sa paggamit sa 

bakuna batok sa Japanese encephalitis

TAGBILARAN CITY, Sept. 11 (PIA)--Nipasidaan ang Food and Drugs Administration (FDA) sa publiko batok sa pagpalit pinaagi online o sa social media sa bakuna batok sa nauso karong Japanese encephalitis (JE) nga makuha gikan sa pinaakan sa lamok.

Ang JE usa ka vector borne disease nga makuha sa pinaakan sa insekto sama sa lamok. Pipila sa mga sintomas niini mao ang pagsakit sa ulo, hilanat, pagsuka ug lisod sa paglihok.

Base sa gipagawas nga Advisory 2017-265 sa FDA, giingong nakadawat ang ilang buhatan og mga taho nga may mga JE vaccine ug uban pang matang sa bakuna nga ginabaligya online sama sa social media ug website ug mga dili awtorisadong distributors ug retailers.

Matud pa sa FDA nga dili makasiguro ang publiko kun pasado sa standard o peke ang maong mga bakuna nga gihanyag sa mga social media sites. 

“Consumers availing from these unauthorized distributors or retailers are at risk of buying vaccines of poor quality, compromised by non-compliance to the required standards of FDA, or worse, at risk of buying counterfeit products,” pasidaan sa FDA.

Kalabot niini, gi-awhag ni Department of Health (DOH) Undersecretary Gerardo Bayugo ang publiko nga sa mga botika o pharmacy lamang angay mopalit og bakuna ug kinahanglang adunay prescription usab gikan sa mga doktor.

Giingong mas maayo usab kun sa doktor mismo magpabakuna.

Kun may nahibaw-ang namaligya og bakuna nga dili awtorisado, mahimong ipahibalo kini sa Center for Drug Regulation and Research sa numero (02) 809-55-96 o sa buhatan mismo sa FDA sa report@fda.gov.ph ug www.fda.gov.ph. (ecb/PIA7-Bohol)