Bohol PNP, bukas nga ikuyog ang mga sakop sa media

sa mga himoong operasyon batok sa ilegal nga droga 

TAGBILARAN CITY, Sept. 8 (PIA)--Bukas ang Philippine National Police (PNP)-Bohol Provincial Police Office (BPPO) nga ikuyog ang mga sakop sa media ngadto sa kapolisan sa himoong operasyon batok sa ilegal nga droga agi og pagsanong sa mando ni Presidente Rodrigo Duterte. 

Matud pa ni BPPO Director Senior Superintendent Felipe Natividad, bukas sila sa mando sa president aron pamatud-an nga dili tinuod ang mga alegasyon sa extrajudicial killings.

Apan gipasabot ni Natividad nga angay unang i-preparar ug ipa-ubos sa security briefings ang mga sakop sa media sa dili pa ikuyog sa operasyon alang sa ilang kahilwasan ug malayo sa peligro.

Gidugang pa sa Bohol police director nga bisan dili maka-estorbo ang mga sakop sa media sa operasyon batok sa ilegal nga droga, gitumbok niini nga may mga protocols nga kinahanglang sundon aron malikayan nga ma-kompromiso ang seguridad sa mga operatiba ug ang kalamposan sa operasyon.

Matud pa ni Natividad nga angay usab hisgotan ang budget alang sa mga protective gear alang sa mga sakop sa media sama sa bullet proof vests nga ipahimo pa.

Ang kampanya batok sa ilegal nga droga sa administrasyong Duterte nakapasuko sa mga human rights group human mapatay ang 17-anyos nga si Kian delos Santos sa usa ka drug-raid sa kaulohan niadtong Agosto. 

Tungod niini, gi-mando ni Duterte nga tugotan ang mga sakop sa media nga ikuyog sa kapolisan sa himoong mga operasyon batok sa ilegal nga droga aron pamatud-an nga dili tinuod ang mga alegasyon sa extrajudicial killings. (ecb/PIA7-Bohol)