Matud sa NAPOLCOM

"Pito," dakog ikatabang 

pagpakgang sa krimen

TAGBILARAN CITY, September 7 (PIA)-- Dako og ikatabang ang pito (whistle) sa pagpugong sa krimen. 

Kini maoy gipakita sa mga tinugyanan atul sa paglusad sa National Crime Prevention Week (NCPW) dinhi sa Bohol niadtong Agosto 31. 

Gawas nga mas makatawag og atensyon ang pagbuhot sa pito, kasagarang kriminal mahadlok niini tungod kay gawas nga ang tingog niini makapakugang, kini usab ang nag-unang gamit sa kapolisan batok sa mga kriminal. 

Mas maayo nga magbitbit permi og pito, ug andam ka nga mogamit niini, matud sa National Police Commission (NAPOLCOM) sa ilang gipakatap nga mga sumbanan sa paglikay sa krimen. 

Gani, bisan kon may pito ka, likayi gihapon ang paglakaw nga mag-inusara, aghat sa NAPOLCOM. 

Kon molakaw, pilia ang mga agi-anan nga may daghang tawo, likayi kanunay ang mga hilit nga lugar ug kon mahimo, ayaw og agi duol sa mga ngitngit nga agi-anan, pangandami ang mga ngitngit nga pultahan, likayi ang mga lugar nga may katago-an ang kriminal ug iandam na ang pito aron magamit dayon, tambag sa ahensya nga maoy nagtutok sa didiplina ug magdumala sa kapolisan. 

Dugang sa NAPOLCOM, kon nakamatikud ka nga may nagsunod, tabok sa pikas nga bahin sa dalan ug lakaw paingon sa may hayag ug didto sa hain man ang may tawo nga makatabang nimo. 

Gibutyag usab sa NAPOLCOM nga kon may sakyanan nga mihunong sa imaong duol og may nabantayan ka nga dili maayo, dagan dayon palayo agi sa kon asa maglisud ang sakyanan sa pagtuyok aron gukdon ka, sugyot sa ahensya. 

Sa kanunay, andam gayud, tambag usab sa mga tinugyanan nga magbantay sa kahusay ug kalinaw. 

Ayaw ihatag ang kahigayunan aron may mahitabo nga krimen: ayaw'g suot sa mga alahas, likayio ang pagdala og daghang kwarta ug ayaw tugoti nga ang mga tulisan makahigayon og sakmit sa imong cellphone kay imong gipatara ang paggamit, dugang tambag nila. 

Nanghinaut ang mga tinugyanan ilabi na sa niadtong magbalantay sa kahusay ug kalinaw nga himoon na nga gawi ang crime prevention, dili lang sa paghandum sa NCPW apan sa matag adlaw, panapos sa Napolcom. 

Ang nasud naghandum sa NCPW sa September 1-7. (rahc/PIA-7/Bohol)

Gibuhot ang mag pito sa mga miduyog sa paglusad sa NCPW dinhi sa Bohol niadtong Agosto 31 ug milanog sa Bohol ang hiniusang syaok batok sa krimen. (PIABohol)