Poor, unsatisfactory performance 

rating makapapha sa empleyado 

TAGBILARAN CITY, September 7 (PIA)--Usa lamang nga bati nga performance o duha ka dili makatagbaw nga performance lang ang kinahanglan aron mataktak ang usa ka empleyado nga nanerbisyo sa goberno. 

Kini maoy pahinumdom sa Civil Service Commission (CSC) sa mga empleyado nga naminaw sa Kapihan sa PIA naidtong Huwebes. 

Kini usab ang angay nga hinuktokan sa mga nagtuo nga ang pagpanarbaho sa goberno, trabaho nga mosulod sa alas 8:00 ug magpaabut na lang nga mo-alas 5:00. 

Kini tungod kay sukwahi sa gituohan, ang pagsagop sa kagamhanan sa Strategic Performance Management System (SPMS) mahimong maoy unang magpatul-id sa sayop nga hunahuna nga sayon ang pangempleyo sa goberno, butyag ni CSC Bohol Provincial Director Elizabeth Mateo. 

Ang SPMS pamaagi nga magkatali ang binuhatan o agi sa empleyado ug sa organisasyon nga iyang na-apilan, pasabut niya. 

Sa pagkadawat sa empleyado, sabutan sa empleyado ug sa organisasyon kon unsa ang mga buluhaton, ug nga kini paninglon usab sa organisasyon pinaagi sa supervisor, human ang unom ka buwan. 

Niini, kon ang empleyado maglay-at sa iyang gimbuhaton, apektado ang organisasyon, sumpay ni Dir Mateo. 

Kon human sa unom ka buwan, bati ang agi sa empleyado, bisan pa sa mga pahimangno, kini na maoy hinungdan nga siya mataktak sa trabaho, matud ni Dir Mateo. 

Gani, kon ang agi, wala makapatagbaw sa organisasyon (unsatisfactory), sulod sa usa ka tuig, mahimong kini ang basehan nga papha-on ang empleyado. 

Dugang ni Dir Mateo, pipila ka tuig gikan karon, i-isa na sa kagamhanan ang palisiya sa pagpili sa mga bag-ong empleyado nga moalagad niini. 

Kini gani, bisan nga sa kasamtangan, ang rekisitos aron madawat sa kagamhanan, kadto nga maka-abut sa minimum nga kwalipikasyon, aron mapili, matud sa hepe sa CSC Bohol. 

Kini nga sistema, maoy giabusaran tungod kay mahimong gamitan sa palakasan. 

Uk kon lisud na karon ang pagpanarbaho, mas lisud na pohon. 

Sumpay sa CSC, sa sulod sa tulo ngadto sa lima ka tuig gikan karon, mas lisud na nga mosulod sa gobernor kon walay igo nga katakus og kwalipikasyon. 

Gibutyag sa CSC nga sagopon na sa kinatibuk-ang burokrasya ang sistema sa pagpangitag empleyado subay sa ilang gihuptan nga abilidad o competency based recruitment. 

Tungod niini, mas lisud na nga sudlong ang pagpangempleyo sa kagamhanan ilabi na niadtong nagsalig gihapon sa palakasay. 

Kasagaran sa mga bag-ong migradwar sa pag eskwela mopili gayud nga makasulod sa pagpanarbaho sa kagamhanan. 

Matud ni Director Mateo, mahimong ang seguridad ug ang stability sa pagpanarbaho sa kagamhanan ang naka-aghat. 

Apan, kon ang hunahuna sa makasulod, igo ra nga molingkon ug maghuwat sa sweldo, labing taas ra ang unom ka buwan nga iyang ikaserbisyo. (rahc/PIA-7/Bohol)

Pabilin nga hagit sa mga empleyado ang pagtagad sa panirbisyo nga responsive, accessible, courteous ug efficient (RACE), kompisal ni CSC Bohol Director Elizabeth Mateo sa Kapihan sa PIA. (rahc/PIA-7/Bohol)