Bohol Northeast Basin MP Dam 

papundohan sa NIA sa Kongreso

TAGBILARAN CITY, September 6, 2017 (PIA) --Usa lang ka proyektong irrigasyon alang sa Bohol, ug magdagway na og matikop na ang nahibiling mga lugar sa Bohol nga angay mapatubigan. 

Kini maoy gibutyag sa bag-o lamang nga na pahimutang nga National Irrigation Administration (NIA) Regional Irrigation Manager Engr Ramon Bugacia, atul sa pagpakighinabi ning bag-o lamang. 

Si Engr Bugacia, kinsa bag-o lamang nga gibalhin sa Central Visayas gikan sa iyang katapusang assignment sa MiMaRoPa, miuna pagpahibaw nga kasamtangan na siyang nangandam human una na nga gitahasan sa pagdepensa sa Senado kabahin sa gisugyot nga Bohol Northeast Basin Multi-purpose Dam Project. 

Kahinumduman nga niadto pang duha ka tuig ang milabay nga napundohan sa NIA ang feasibility Project og detailed engineering works sa nahsigutang proyekto, segun sa taho ni Kongresista Aristotle Aumentado. 

P12.11 million ang gipahat sa NIA sa iyang budget sa 2016 alang sa pagtuon kon angayan ba og dili ba alkanse ang kagamhanan sa paggasto alang sa dako nga dam nga adto tukoron sa Danao. 

Ang feasibility study, mahimong gitak-opan na og naa nay bag-ong detailed engineering works alang sa proyekto, apan buot ni Engr Bugacia nga iya kini usa nga matun-an og una. 

Sa dili madugay, idepensa na kini sa NIA atubangan sa mga magbabalaud nga magpahimutang sa pundo alang sa katukoran niini, matud sa RIM nga natawo sa South Cotabato.

Sa laing bahin, si kong Aumentado mibutyag nga motabang siya og pangitag pundo alang sa proyekto. 

Kon matuman ang laraw sa gitas-on sa dam, mokabat usab sa 19,000 ektaryas ang mga basakan sa Danao, Trinidad, Ubay ug Bien Unido ang mapatubigan, segun sa pagtuon niini, matud sa laing tinubdan sa NIA. 

Sa Irrigation development Plan sa NIA, ang Bohol kasamtangan nga may 19,339.65 ka ektaryas nga kaumahan nga wala pa kaalagari sa patubig ug nagsalig pas uwan. 

Sa 411,730 ektaryas nga kinatibuk-ang land area sa Bohol, 260,300 ektaryas lamang niini ang angay nga abton sa patubig tungod kay mahimong tikaron ngadto sa humay. 

Sa nanglabay nga katuigan, nakapahimutang ang NIA sa mga irrigasyon ma komunal man o small reservoir impounding systems (SRIP) nga nakapatubig sa 24,676.35 ektaryas. 

Niini, sa 44,076 ektaryas nga mamahimong kapatubigan, naa na lamang sa 19 mil ektaryas ang trabahoonon sa NIA, segun sa datus nga gihatag sa ahensya sa irrigasyon base sa Disyembre 31, 2016. 

Niining tuiga, gipundohan sa NIA ang tulo ka mga gagmay nga mga SRIP sa Cayacay Alicia-Abaca Mabini, Beliw-Imelda Ubay, ug Bonotbonot Buenavista. 

Mokabat sa 530 ektaryas ang abton sa patubig sa Cayacay-Mabini, 400 ektaryas usab ang abton sa Benliw-Ubay SRIP samtang 550 ektaryas ang abton sa Bonot-Bonot SRIP. 

Kinatibuk-ang 1480 ektaryas ang mahimong matipak sa 19,339.65 hinungdan nga 17,859 ektaryas na lang ang patubig nga kinahanglang pundohan sa kagamhanan. 

Gani, sanapan na kini kon ugaling makuha sa NIA nga kapundohan ang proyekto sa Bohol.

Kining tanan aron makatabang ang Bohol nga makab-ut sa rehiyon ang rice sufficiency, panapos ni Engr Bugacia. (rahc/PIA-7/Bohol)

Si NIA RIM Engr Ramon Bugacia misalig nga ikadapensa sa NIA ang laraw sa katukoran sa Bohol Northeast Basin MP Dam nga magtabang sa Bohol sa pagpadaghan pa sa iyang rice sufficiency nga ikatampo sa rehiyon. (rahc/PIA-7/Bohol)