Purok Power ipasundog sa

tibuok Kabisay-an - OPAV

TAGBILARAN CITY, September 6 (PIA)--Dalhon sa Office of the Presidential Assistant to the Visayas (OPA) ang sistema sa purok power sa Bohol aron sundon sa tibuok rehiyon. 

Kini maoy gibungat ni OPAV Assistant Secretary ug Atty Gerald Anthony Gonzales didto sa dinungan nga Rehiyonal nga paglusad sa National Crime Prevention Week sa Bohol Cultural Center sa miaging semana. 

Nakita sa OPAV ang ka epektibo sa Purok Power ilabi na sa pagpalig-on sa intelligence network sa kabarangayan aron dili maka-gamot ang kriminalidad ug kawalay pagtamud sa balaod, matud ni Asec Gonzales, kinsa maoy namulong sa ngalan ni OPAV Secretary Mike Dino. 

Kahinumduman nga wala molampus ang mga bandidong sakop sa Abu Sayyaf sa pagkutaw og kasamok ug kalisang sa Bohol niadtong Abril, tungod sa dali nga paglihok sa komunidad nga nahulga sa kagubot.

Una na nga gitumbok ni Gob Edgar Chatto ang kritikal nga buhat sa komunidad sa Napo Inabanga ug sa silingang mga barangay aron matumbok ug mapruwebahan ang presensya sa mga armadong kalalakin-han sa nga mitapon sa Barangay nga naa sa daplin sa suba sa Inabanga. 

Ang Purok Power usa ka stratehiya nga gisagop sa Bohol aron pag-asdang sa mga programa sa pag-ugmad sa komunidad. 

Gigamit niini ang inabagay og tinabangay sa katawhan ug sa mga ahensya nga nagatanyag sa nag-unang serbisyo aron dungan nga himo-an og mga solusyon ang mga suliran sa komunidad nga nag-babag niini nga maka-uswag sa kahimtang sa iyang katawhan. 

Gawas sa mga suliran sa edukasyon, imprastraktura, kasanihan, teknolohiya, panguma, seguridad ug mga serbiso alang sa mga nabiyaang sektor, giresolbar usab sa tnabngay ang pagpatin-aw sa kamatuoran nga walay kaugmaran nga mamugad kon walay pugaran sa kalinaw. 

Niini, nadasig ang kadaghanan nga magmabinantayon aron iiway sa ilang mga lugar ang mga kriminal og kadtong walay pagtamud sa kamut sa balaod. 

Bisan pa nga gitaho sa OPAV nga namugna na nila ang usa ka task force nga gilangkoban sa mga ahensya nga maoy magbantay sa kadagatan sa Visayas, kinahanglan pa gihapon nga palig-onon ang internal nga seguridad. 

Dinhi, daku og ikatabang ang Purok Power, matud sa OPAV. (rahc/PIA-7/Bohol)

Gawas nga hiusahon ang Visayas sa mga tulay ug railways, bugkoson usab ang mga komunidad sa purok system, butyag ni OPAV Asec Gerald Anthony Gonzales regional nga paglusad sa Crime Prevention Week dinhi sa Bohol. (PIABohol)