Palasyo, gi-alerto ang mga LGUs 

batok sa Japanese encephalitis

MANILA, Sept. 15 (PIA)--Gi-alerto sa Malakanyang ang mga local government units (LGU’s) ug gi-awhag nga ipahibalo dayon sa Department of Health (DoH) kun may gidudahan silang kaso sa Japanese encephalitis sa ilang mga lugar.

Dungan niini, gihupay ni Presidential Spokesman Ernesto Abella ang kahadlok sa publiko sa pagkatap sa nasod sa Japanese encephalitis ug giingong hingpit nga naka-monitor ang gobyerno kalabot niini.

Giingong kasagarang mokatap kining maong sakit sa panahon sa ting-ulan diin paspas ang pagbalhin o pagtakod niini sa uban tungod sa pagdaghan sa mga lamok.

Nanawagan si Abella sa publiko ug mga opisyal sa barangay nga magtinabangay sa pagpanglimpyo sa ilang mga palibot sama sa ilang ginahimo aron malikayan ang pagkatap sa sakit nga dengue. 

Matud pa nga kinahanglang matumbok ang gitapokan sa mga lamok ug gub-on kini aron mapatay ang mga lamok nga nagdala sa maong virus.

Sa pagkakaron, gihuman pa sa DoH ang mga plano aron mapahibalo ang tukmang bakuna sa mga bata batok sa Japanese encephalitis sa sunod tuig.

“The government assures the public that it is closely monitoring cases of Japanese encephalitis in the country with the onset of the rainy season when transmission of the virus peaks because of the rise of the mosquito population. We encourage the local government units to report and notify suspect cases of Japanese encephalitis. Prevention of Japanese encephalitis, like dengue, focuses on the identification and destruction of breeding places of mosquitoes as the Department of Health (DOH) is currently firming up plans to introduce vaccination among young children in 2018,” matud pa ni Abella. (ecb/PIA7-Bohol)

================

PNP: Walay kamanduan nga nagdili sa 

mga media sa pagkuha og ‘spot report’

MANILA, Sept. 15 (PIA)--Gitataw sa Philippine National Police (PNP) nga walay kamanduan nga gipagawas si PNP Chief Ronald ‘Bato’ Dela Rosa nga nagdili sa media nga makakuha og spot report gikan sa kapolisan.

Matud pa sa tigpamaba sa PNP nga si Chief Superintendent Dionardo Carlos, daan na o niadtong tuig 2014 pa ang ilang memorandum nga nagbawal sa pagpagawas sa spot report ilabi na kun may ‘ongoing’ investigation o mga babaye ug menor de edad ang nalambigit sa krimen.

Apan giingong mahimo ra makakuha og kopya sa spot report ang media kun mohimo sila og formal request.

Gipasabot ni Carlos nga imbes nga spot report, angay nga press release ang ipagawas sa mga polis.

Giingong mahimo usab direktang makig-alayon ang media sa mga commander aron makapangutana sa mga kinahanglan nilang detalye ilabi na kun wala man sila’y gitagong impormasyon ug ang ilang kamanduan dili paglapas sa Freedom of Information Law.

Ning bag-o lang, mi-apelar ang National Union of Journalists of the Philippines (NUJP) nga bawion sa PNP chief ang kamanduan tungod kay giingong pagpanglapas ang maong kamanduan sa pagpakita sa transparency ug accountability sa police operations. 

Tungod niini, gipahinumdoman sa nasudnong polisya ang ilang kapolisan sa pag-review sa PNP-media relations manual. (ecb/PIA7-Bohol)